भांगरभूंय | प्रतिनिधी
पुलीस म्हासंचालकः सध्या तरी विशेश तपास पंगड नेमपाचो निर्णय ना, तपास पारदर्शक
भांगरभूंय । प्रतिनिधी
पणजीः सरकारी नोकऱ्यो दिवपाचें हांयस दाखोवन लोकांची अर्थीक फटवणूक करपाच्या प्रकरणांत आतां मेरेन 29 एफआयआर दाखल जाल्यात, जाल्यार 33 जाणांक अटक केल्या. अटक केल्ल्या दुबावितांनी पयशे घेतिल्ल्यांक नोकऱ्यो दिल्ल्याचे पुरावे मेळूंक नात. हे संबंदांत सध्यातरी विशेश चवकशी पंगड (एसआयटी) नेमपाचो निर्णय जावंक ना, अशें पुलीस म्हासंचालक अलोक कुमार हांणी शेनवारा स्पश्ट केलें.
पुलीस मुख्यालयांत घेतिल्ले पत्रकार परिशदेंत म्हासंचालक अलोक कुमार उलयताले. तांचे वांगडा उत्तर गोंय पुलीस अधिक्षक अक्षत कौशल, दक्षीण गोंय पुलीस अधिक्षक सुनिता सावंत हांचे सयत हेर अधिकारी ह्या वेळार हाजीर आशिल्ले.
सरकारी नोकरी दिवपाचें हांयस दाखोवन फटवणूक केल्ल्या प्रकरणांत दुबावीत आनी पिडीत व्यक्ती एकामेकाच्या संपर्कांत आयले. सरकारांतले मंत्री, आमदारां कडेन आपले बरे संबंद आसात, अशें भासोवन तांणी पिडीत व्यक्तींक फटयले. पूण तांणी पयशे घेतिल्ल्यांक सरकारी नोकऱ्यो दिल्ल्याचें कसलेच पुरावे सांपडूंक नात. हे संबंदांत आतां मेरेन आयिल्ल्या सगळ्या प्रकरणांचो तपास आपले सयत पुलीस म्हानिरिक्षकांचे देखरेखी खाला योग्य पद्दतीन चल्ला. ते खातीर हे संबंदांत ‘एसआयटी’ स्थापन करपाचो कसलोच निर्णय जावंक ना, अशें अलोक कुमार हांणी सांगलें.
अशे तरेच्या भानगडीं विशीं जांचे कडल्यान कागाळी येतात, तांची पारदर्शकतायेन चवकशी करून दुबावितांक अटक करतात. तांची मालमत्ता जप्त करतात. तांचे बँकांतले वेव्हार तपासतात. हातूंत आतां मेरेन कोणेनूच हस्तक्षेप करूंक ना, अशेंय अलोक कुमार हांणी स्पश्ट केलें.
नोकरी भानगड प्रकरणांतल्या कांय दुबावितांचे मंत्र्यां वांगडाचे फोटो सोशल मिडियाचेर व्हायरल जातात, हो विशय पत्रकारांनी उपस्थीत केलो. त्या वेळार अलोक कुमार हांणी सांगलें, अश्या प्रकरणांत अटक केल्ल्या दुबावितांनी मंत्र्यां वांगडा काडिल्ले फोटो व्हायरल करून आनी तांचे वांगडा बरे संबंद आशिल्ल्याचें सांगून लोकांक फटयल्ल्याचें मुखार आयलां. मंत्र्यां वांगडा आशिल्लो तांचो फोटो हो पुरावो जावपाक शकना, अशेंय अलोक कुमार हांणी सांगलें.
दक्षीण गोंय पुलीस अधिक्षक सुनिता सावंत हांणी सांगलें, सरकारी नोकरी दिवपाचें हांयस दाखोवन लोकांक तोपी घालपाचे प्रकार दक्षीण गोंयांत 2014 सावन सुरू आसात. दक्षीण गोंयांत आतां मेरेन अशे तरेच्यो 12 कागाळी नोंद जाल्यात. तातूंत 21 तल्या 20 दुबावितांक अटक केल्या. तांचे कडल्यान दोन मिनी बशी, 12 चारचाकी आनी 4 दुचाकी जप्त केल्यात, अशें सावंत हांणी सांगलें. उत्तर गोंयांत दिवचल, आगशी, पर्वरी, पोरणें गोंय, म्हापशें आनी कोलवाळ ह्या पुलीस स्टेशनांचेर आतां मेरेन 17 कागाळी दाखल जाल्यात. 13 जाणांक अटक केल्या. अटक केल्ल्या सगळ्या दुबावितांचो पुलीस खोलायेन तपास करतात, अशी म्हायती उत्तर गोंय अधिक्षक अक्षत कौशल हांणी दिली.
द. गोंयांतली भानगड 5 कोटींची !
नोकरी भानगड प्रकरणांत अटक केल्ल्या मदीं दक्षीण गोंयांतल्यो 6 बायलो आनी 14 दादल्यांचो आस्पाव आसा. तातूंतल्या खूब जाणांच्या बँक खात्यांची चवकशी चालू आसा. तांचे आड पुरावे एकठांय करपाचें काम चल्लां. दक्षीण गोंयांत ही भानगड 5 कोटीं परस अदीक रकमेचो आसा, अशें सुनिता सावंत हांणी सांगलें.
नोंद जाल्ल्यो कागाळी
उत्तर गोंय
दिवचल 5
आगळी 4
पर्वरी 2
पोरणें गोंय 1
म्हापशें 1
कोलवाळ 1
दक्षीण गोंय
वास्को 4
फोंडें 3
म्हाड्डोळ 2
काणकोण 2
मडगांव 1
अटक केल्ल्या दुबावितां कडल्यान जप्त केल्ली मालमत्ता
भांगर – 166 ग्राम
मिनीबशी – 2
चारचाकी – 12
आतां मेरेन अटक जाल्ले दुबावीत
पुजा पुरुषोत्तम नायक
दीपश्री महातो उर्फ दीपश्री सावंत गांवस
पुजा उर्फ प्रिया यादव
श्रुती प्रभुगांवकार
उमा पाटील
शिवम पाटील
रामेश्वर मांद्रेंकार
मिथील च्यारी
योगेश शेणवी कुंकळ्ळीकार
प्रकाश राणे
पराग रायकार
गोविंद मांजरेकार
सुरज नायक
सोनिया आचारी
विषया गावडे
संदीप परब
माणिकराव राणे
अजीत सतरकार सागर नायक
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
