भांगरभूंय | प्रतिनिधी
पणजीः उत्तर प्रदेशांतल्या 23 वर्सां पिरायेचे एके चलयेक नोकरी दिवपाचें आस्वासन दिवन तिची मानसीक, भावनीक आनी वैयक्तीक रितीन फटवणूक केल्ल्या आरोपा खाला आदले मंत्री विनोद पालयेकार हांचे आड उत्तर गोंय पुलिसांनी गुन्यांव नोंद केलो.
हो फटवणुकीचो प्रकार ऑगस्ट 2019 ते जानेवारी 2026 ह्या काळांत घडलो. बार्देश तालुक्यांत रावपी हे चलयेची ऑगस्ट 2019 वर्सा आदल्या मंत्र्याकडेन वळख जाली. त्या वेळार दुबावितान तिका नोकरी दिवपाचें आस्वासन दिले.
उपरांत दुबाविता वांगडा रावतना ताणें वयले आस्वासन दिवन अप्रामाणिकपणान आनी मुद्दाम तिका लैंगीक त्रास आनी शारिरीक अत्याचार केलो. ताका लागून तिचो स्वाभिमान आनी शारिरीक प्रामाणीकपण धोक्यांत पडले.
दुबावित दिल्लें उतर पाळपाक अपेसी थारलो. ताणें तिका फटयली. इतलेंच न्हय तर ताणें तिका मानसीक आनी भावनीक त्रास दिल्ल्याचो आरोप चलयेन आपले कागाळींत केला. हे कागाळीचेर आदारुन पुलिसांनी दुबावीत आदल्या मंत्र्या आड फटोवपाचो गुन्यांव नोंद केलो. पुलीस फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
