भांगरभूंय | प्रतिनिधी
पारदर्शक एजन्सी वरवीं नोकऱ्यो दिवपाची काँग्रेसीची मागणी
भांगरभूंय । प्रतिनिधी
पणजीः गोंयांतल्या नोकर भरती घोटाळ्याचे पडसाद दिल्ली मेरेन पावल्यात. अखील भारतीय काँग्रेसीचे सचीव अलोक शर्मा आनी कायमस्वरुपी निमंत्रीक तशेंच आदले काँग्रेस प्रदेशाध्यक्ष गिरीश चोडणकार हांणी बुधवारा दिल्लींत पत्रकार परिशद घेवन ह्या विशयाचेर आवाज काडलो. तशेंच पारदर्शक एजन्सी वरवीं हे मुखार गोंयांत सरकारी नोकरीचीं पदां भरची, अशी तांणी मागणी केली.
गोंयांतल्या सरकारी नोकर भरतींतलो घोटालो प्रकरणांत भाजपांतले खूबशे फुडारी, कार्यकर्त्यांचो आस्पाव आशिल्ल्याचें मुखार आयलां. भाजप सरकारान 2019 त कर्मचारी भरती आयोगा वरवीं सरकारी पदां भरपाचें विधेयक हाडिल्लें. ते उपरांत 2024 मेरेन ह्या विधेयकांत दोन खेपे दुरुस्ती केली. गोंय सरकाराक ह्या आयोगा वरवींच भरती करपाची आशिल्ली, जाल्यार सरकारान विधेयकांत दुरुस्ती कित्याक केली, असो प्रस्न अलोक शर्मा हांणी उपस्थीत केलो. गोंयांतल्या ह्या घोटाळ्याक लागून हजारांनी पात्र उमेदवारांक मार बसला. ताका जापसालदार राज्य सरकार आशिल्ल्याचो दावो लेगीत शर्मा हांणी केलो.
गिरीश चोडणकार हांणी सांगलें, कर्मचारी भरती आयोगा वरवीं सरकारी नोकर भरती करपाचें 2019 त निश्चीत जाल्लें. पूण राज्य सरकारान जाणिवपूर्वक विधेयकांत दुरुस्ती हाडून हो अधिकार खात्यांक दिलो. सरकारी नोकरेंतल्या घोटाळ्याक लागून गोंयांतले अनुसुचीत जाती (एससी), अनुसुचीत जमाती (एसटी) आनी हेर मागासवर्गीय (ओबीसी) ह्या तीन गटांतल्या उमेदवारांचेर अन्याय जाला. कारण तांचे खातीर आशिल्लीं पदां उक्त्या गटांतल्या तरणाट्यांक मेळ्ळ्यांत, अशेंय तांणी सांगलें. राज्य सरकारान सरकारी नोकऱ्यो दिवपा खातीर पारदर्शक एजन्सीची नेमणूक करची आनी ते एजन्सी वरवींच हीं पदां भरचीं, अशीय मागणी तांणी केलीं.
‘आप’चे राज्यपालांक निवेदन
गोंयांतल्या सरकारी नोकरी घोटाल्याची तीन वांगडी न्यायालयीन आयोगा वरवीं चवकशी जावची आनी ह्या प्रकरणांत राज्यपाल पी. एस. श्रीधरन पिल्लई हांणी हस्तक्षेप करचो, अशे मागणीचें निवेदन बुधवारा आम आदमी पक्षान (आप) राज्यपालांक सादर केलें.
न्यायालयीन चवकशी करातः काँग्रेस
नोकऱ्यां खातीर पयशे घेवपाच्या प्रकरणांत आतां मेरेन अटक जाल्ल्या खूबश्या जाणांचें भाजपा कडेन संबंद आशिल्ल्याचें स्पश्ट जालां. ह्या प्रकरणाची न्यायालयीन चवकशी जावपाकूच जाय, अशी मागणी काँग्रेसीचे उपाध्यक्ष सुनील कवठणकार हांणी बुधवारा घेतिल्ले पत्रकार परिशदेंत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
