भांगरभूंय | प्रतिनिधी
एकल्यान 5 जाल्यार दुसऱ्यान 12.50 लाखांक फटयले
भांगरभूंय । प्रतिनिधी
फोंडें: फोंडें म्हालांत सरकारी नोकरी घोटाळ्यांक ओतो आयला. सरकारी नोकरी दिवपा खातीर 5 लाख रुपया घेवन फटवणूक केल्ल्या प्रकरणांत आयतारा रातीं म्हाड्डोळ पुलिसांनी संदीप जगन्नाथ परब (तारीवाडो- माशेल) हाचे आड गुन्यांव नोंद करून ताका रातीं उसरां अटक केली. जाल्यार सरकारी नोकरी दिवपा खातीर योगेश शेणवी कुंकळीकार (49. ढवळी) ह्या शिक्षकाक साडेबारा लाख रुपया घेवन फटवणूक केल्ल्याचो फोंडें पुलीस स्टेशनार गुन्यांव नोंद करून अटक केली. अटक केल्ल्या दुबावितान 1 कोटी 20 लाख 50 हजार रुपयांची फटवणूक केल्ल्याचें उक्तें जालां. न्यायालयान ताका 3 दिसांचो रिमांड दिला.
सध्या फोंडें पुलिसांनी अटक केल्ल्या दीपश्री सावंत हिणें संदीप परब हाचे कडेन वळख करून सरकारी नोकरी दिवपाचें हांयस दाखयलें. ते प्रमाण फेब्रुवारी 2024 त खांडोळें- माशेलच्या विशाल अर्जून गांवकार ह्या तरणाट्यान रान खात्यांतले नोकरे खातीर संदीप परब हाचे कडेन 5 लाख रुपया दिल्ले. संदीपान ती रकम दीपश्री कडेन दिल्ली. ह्या प्रकरणांत विशाल गांवकार हाणें आयतारा संदीप परब हाचे आड पुलीस स्टेशनार रितसर कागाळ दाखल केली. म्हाड्डोळ पुलिसांनी गुन्यांव नोंद करून संदीप परबाक अटक केल्या. अटक केल्ल्या दुबाविताक सोमारा न्यायालयांत उबो केलो तेन्ना न्यायाधिशान ताका 3 दीस पुलीस कोठडेंत दवरपाचो आदेश दिलो.
ह्या प्रकरणांत दीपश्री सावंत हिका लेगीत अटक जावपाची शक्यताय आसा. कांय दिसां आदींच संदीप परबान दीपश्री सावंता ड 44 जाणां कडल्यान सुमार 4 कोटी रुपया घेतिल्ल्या प्रकरणांत म्हाड्डोळ पुलीस स्टेशनार कागाळ दाखल केल्ली. मात पुलिसांनी अजून दीपश्री सावंत हिचे आड गुन्यांव नोंद करूंक ना. निरिक्षक योगेश सावंत ह्या प्रकरणांत तपास करता.
फोंडें वाठारांतल्या एका हायस्कुलांत शिक्षक आशिल्ल्या योगेश शेणवी कुंकळीकार हाणें सरकारी नोकरे खातीर साडेबारा लाख रुपया घेवन फटवणूक केल्ल्याची कागाळ आयतारा संगम बांदोडकार हांणी दाखल केले उपरांत ताका अटक केली. अटक केल्ल्या दुबाविता आड फोंडें पुलीस स्टेशनार आनीक गुन्यांव नोंद जावपाची शक्यताय उक्तायतात. कारण पुलीस चवकशेंत दुबावितान उच्च शिक्षण घेतिल्ल्या खूबश्या विद्यार्थ्यां कडल्यान 1 कोटी 20 लाख 50 हजार घेतिल्ल्याचें उक्तें जालां. दुबावितान उपजिल्होधिकारी, अबकारी खात्यांत अधिकारी आनी हेर उच्च पदां खातीर रकम घेतिल्ली.
आयतारा कागाळ दाखल केल्ल्या संगम बांदोडकार हांणी आपलेचे धुवेक उच्च पदा खातीर जुलयांत साडेबारा लाख रुपया दिल्ले. गोंयांत सध्या नोकरी दिवपाचे घोटाळे उक्ते जायत आशिल्ल्यान दुबावितान सकाळीं रितसर कागाळ दाखल करपाचो यत्न केलो, पूण सांजे वेळार ताचे आड रितलर कागाळ दाखल जाल्ल्यान पुलिसांनी गुन्यांव नोंद करून ताका अटक केली. ह्या प्रकरणांत आनीक कांय दुबावितांक अटक जावपाची शक्यताय आसा. उपअधिक्षक शिवराम वायंगणकार हांच्या मार्गदर्शना खाला निरिक्षक विजयनाथ कवळेंकार अदीक तपास करतात.
दुबावितांनी कागाळ करपाचो केल्लो यत्न
फोंडें पुलिसांनी अटक केल्लो योगेश शेणवी कुंकळीकार आनी म्हाड्डोळ पुलिसांनी अटक केल्लो संदीप परब हाणें हेरांक सरकारी नोकरी दिवपाचो यत्न केलो. फाटल्या कांय दिसां सावन प्रकरण वाडत आशिल्ल्यान दोगांनीय पुलीस स्टेशनार स्वताक वाटावपा खातीर कागाळी दिवपाचो यत्न केलो, पूण दोगां आड पुलीस स्टेशनार गुन्यांव नोंद जाल्ल्यान दोगांकूय अटक करून घेवचें पडलां.
आवाजाचें लींक !
फाटले 2- 3 दीस सोशल मिडियाचेर व्हायरल जाल्ली ‘ती’ क्लीप काँग्रेस प्रदेशाध्यक्ष अमीत पाटकार हांणी पुलिसांक सादर केली. तातूंतलो आवाज अटक केल्ल्या दीपश्री सावंत गांवस आनी एका सरकारी अधिकाऱ्याचो, अशें कळटा.
चिखलेच्या सुरज नायकाक अटक
वास्कोः नोकरेचें हांयस दाखोवन 4 लाख 30 हजार घेतिल्ल्या प्रकरणांत वास्को पुलिसांक जाय आशिल्लो सुरज नायक (चिखली) हाका वास्को पुलिसांनी सोमारा 11 नोव्हेंबराक अटक केली. मजगतीं, आयतारा 10 नोव्हेंबराक अटक केल्ल्या गोविंद मांजरेकार हाका वास्को प्रथमश्रेणी न्यायालयांत उबो केलो तेन्ना ताची सशर्त जामिनाचेर सुटका केली. शिक्षण खात्यांत मल्टी टास्कची नोकरी दिवपाचें हांयस दाखोवन मांजरेकार आनी सुरज नायक हांणी नवे वाडेचे साक्षी केरकार हिचे कडल्यान 4 लाख 30 हजार रुपया मार्च 2023 ते मे 2023 ह्या काळांत घेतिल्ले. ते उपरांत दोगूय नोकरी दिवपाक शकले ना. हे खातीर केरकार हांणी वास्को पुलीस स्टेशनार 9 नोव्हेंबराक कागाळ दाखल केल्ली. ते कागाळेची दखल घेवन 10 नोव्हेंबराक मांजरेकार हाका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
