भांगरभूंय | प्रतिनिधी
मुख्यमंत्रीः खंयच्याय पक्षाचो आसूं, कारवाय जातलीचपणजीः सरकारी नोकरेच्या हांयसान सामान्य लोकांची अर्थीक फटवणूक केल्ले खंयच्याय पक्षाचे आसूं, तांकां कशेंच सोडचो ना. मुख्यमंत्री डॉ. प्रमोद सावंत हांणी मंगळारा पत्रकारां कडेन उलयतना ही गजाल स्पश्ट केली. अशा प्रकरणांत आतां मेरेन 18 जाणांक अटक केल्या अशेंय तांणी सांगलें.
आतां मेरेन सरकारी नोकरी दिवपाच्या निमतान गोंयकारांची कोट्यांनी रुपयांची फटवणूक केल्ल्याची जायतीं प्रकरणां उजवाडाक आयल्यात. मंगळारा अटक केल्ल्या पूजा नायक, दिपाश्री सावंत गांवस आनी मंगळारा अटक केल्ल्या श्रुती प्रभुगांवकार ह्या टोळयांचो अशा प्रकरणांत संबंद आशिल्ल्याचें उक्तें जालां. हे फाटभुंयेर उलयतना मुख्यमंत्र्यांनी सांगलें, अशा प्रकरणांत घुस्पल्लो कोणूच वाचचो ना, अशी शिटकावणी तांणी दिली. आतां मेरेन सरकारी नोकरेच्या हांयसान लोकांक लुटपी 18 जाणांक अटक केल्या. आतां मेरेन मेळिल्ल्यांक तो खंयच्याय पक्षाचो आसूं, तांचेर कसलीच दया दाखोवचे नात, तांचेर कारवाय करतले आनी तांची मालमत्ता जप्त करतले अशें मुख्यमंत्र्यांनी सांगलें.
गोंयांत सरकारी नोकऱ्याे पयशे दिवन मेळनात. अशें आसून लेगीत जायते जाण सरकारी नोकरेच्या हांयसान पयशे घेवपी ही गोंयांक लागिल्ली कीड. गोंयकारांनी आतां सावन जतनाय घेवपाची गरज आसा. फाटल्या कांय दिसांनी घडिल्ल्या प्रकरणांत सांपडिल्ल्या सरकारी अधिकारी, शिक्षकांची नोकरी वतली. हाचे भायर आदीं भाजपाचे वांगडी आशिल्ल्यांचेर खर कारवाय जातली अशेंय आश्वासन तांणी दिलें.
…………………………………….
श्रुती प्रभू गांवकाराचो भाजपा कडेन कसलोच संबंद ना: सावयकार
– सरकारी भरती घोटाळ्यांत घुस्पल्ली श्रुती प्रभू गांवकार हाचे पयलीं भाजपाची वांगडी आशिल्ली. पूण, आतां ती भाजपांत ना अशें आदले खासदार आनी राज्य भाजपाचे सरचिटणीस नरेंद्र सावयकार हांणी मंगळारा घेतिल्ले पत्रकार परिशदेंत उलयतना स्पश्ट केलें.
– सरकारी नोकरेचे हांयस बाळगून लोकांक लुटपी कोणाकूच सरकारा कडल्यान आलाशिरो मेळचो ना. हातूंत भाजपाचे फुडारी आनी कार्यकर्ते आसत जाल्यार नागरिकांनी मुखार येवन तांचे आड कागाळी करच्यो. तांचेर केल्ल्या आरोपांत तथ्य आसल्यार तांकां पक्षांतल्यान काडून उडयतले आनी ताचेर कारवाय करतले अशेंय सावयकार हांणी स्पश्ट केलें.
……………………………..
सरकारी नोकर भरती घोटाळ्यांत आतां मेरेन अटक केल्ल्या जायत्या जाणांचे भाजपा कडेन संबंद आसात हें उजवाडाक आयलां. अशा प्रकरणांक लागून सरकारी नोकरे खातीर पात्र आशिल्ल्या जायत्या जाणांचेर अन्याय जाला. देखून सरकारान सरकारी नोकरे खातीर भरती प्रक्रिया रद्द करची अशी मागणी गोवा फॉरवर्डाचे अध्यक्ष आनी आमदार विजय सरदेसाय हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
