नोकरी करून उबगले? जाल्यार हीं कामां तुमचे खातीर

भांगरभूंय | प्रतिनिधी

दरेकलो स्वताचें आनी आपल्या कुटुंबाचें पोट भरपा खातीर नोकरी वा धंदो करता. पूण हालींच्या काळांत नोकरे परस वेवसायाक चड प्राधान्य मेळपाक लागलां. सकाळीं ९ ते सांजवेळार ५ वरां मेरेन सदचें जिवीत जगचे परस तरणाटे आतां स्वताचो वेवसाय सुरू करून धनी जावपाक सोदतात.
सरकार तरणाट्यांक स्वताचो वेवसाय सुरू करपाक उर्बा दिता. तशेंच सरकार वेवसाया खातीर भांडवल दिता. विंगड विंगड येवजण्यां वरवीं वेवसाय सुरू करपा खातीर रीण दिवपाचें काम सुरू आसा. तशेंच बँकोय तरणाट्यांक वेवसायीक रिणां दितात. खुबश्या जाणांक वेवसाय सुरू करपाची इत्सा आसता पूण खंयचो वेवसाय सुरू करचो तें कळना. हाका लागून आयज आमी पांच वेवसायीक कल्पनां तुमचे मुखार मांडटात.

मोबायल दुरुस्ती : ह्या एकुणिसाव्या शेंकड्याक संगणक आनी मोबायल युग म्हणून वळखतात. आतां सगळ्यां कडेन स्मार्टफोन आसात. फाटल्या कांय वर्सांत मोबायल फोनाचो वापर खूब वाडला. मोबायलाचो वापर वाडत गेला तसो मोबायल दुरुस्ती करपी लोकांचीय मागणी वाडत आसा. देखून मोबायल दुरुस्तीचो वेवसाय तुमकां फायद्याचो थारतलो.

ब्लॉग तयार करचो : तुमकां बरोवपाची आवड आसा वा एका खंयच्याय विशयांत तुमकां खोलायेन गिन्यान आसल्यार तुमी ब्लॉग तयार करून लाखांनी रुपया जोडपाक शकतात. ब्लॉग सुरू करपाक पयलीं वेबसायटीची डिझायन तयार करची पडटली. वेबसायट तयार केल्या उपरांत ताचेर तुमच्या आवडीच्या विशयाचेर बरोवंक मेळटा. पूण तुमी ब्लॉग करतात त्या विशयाचेर तुमकां बरी म्हायती आसूंक जाय. हालींच्या काळांत जायत्या जाणांनी ब्लॉगिंगांतल्यान लाखांनी रुपया मेळयल्यात. तुमींय ब्लॉगिंग सुरू करून बरी येणावळ मेळोवंक शकतात.

युट्युब चॅनल : युट्युब चॅनल सुरू करून ताचेर व्हिडियो घालून तुमी जोडूं येता. तुमी शेती, शेअर मार्केट, तंत्रगिन्यान वा तुमकां बरें गिन्यान आशिल्ल्या खंयच्याय विशयाचेर व्हिडियो करून युट्युबाचेर अपलोड करूं येता. Google AdSense वरवीं YouTube चेर अपलोड केल्ल्या ह्या व्हिडियोचेर जायराती घालतात आनी अशे तरेन तुमी जोडटात.

ट्युशन : भुरग्यां खातीर ट्युशन सुरू करूं येता. इंग्लीश, मराठी, इतिहास, विज्ञान, गणीत आदी विशय शिकोवं येता. एका विशयाची बरी जाणविकाय आसल्यार आनी त्या विशयांत उच्च शिक्षण आसल्यार भुरग्यांक शिकोवपा खातीर वर्ग घेवन बरे पयशे जोडूंक मेळटात. ५ वी ते १० वेच्या विद्यार्थ्यां खातीर ट्युशन वर्ग घेवंक मेळटात. जेन्ना तुमचो कोचींग क्लास वाठारांत लोकप्रिय जाता तेन्ना शिक्षकांचो आंकडो वाडोवन तुमी बरे तरेन जोडपाक शकता.

ट्रान्सलेटर : तुमकां हिंदी, कोंकणी, इंग्लीश, मराठी, गुजराती, पंजाबी वा हेर परकी भासो खबर आसल्यार ट्रान्सलेटराची नोकरी तुमकां एकदम योग्य थारतली. जायत्या सुवातींनी इंग्लीश ते कोंकणी, कोंकणी ते मराठी, हिंदी ते मराठी, मराठी ते हिंदी, इंग्लीश ते मराठी, मराठी ते इंग्लीश अशे अणकारपी जाय पडटात. हाका लागून तुमी बरो अणकारपी आसल्यार बर्‍या पगाराची नोकरी मेळटली. मात शक्यतो आॅनलायन ट्रान्स्लेशन घेवचें न्हय.