भांगरभूंय | प्रतिनिधी
नवी दिल्ली, खबरां संस्था ः भारतीय पगारदार लोक पगारांतल्यान 33% परस चड पयशे ईएमआयचेर खर्च करतात. ‘हाव इंडिया स्पेंड्स: अ डीप डायव्ह इनटू कंझ्युमर स्पेंडिंग बिहेविअर’ ह्या अहवालांतल्यान ही म्हायती मेळ्ळ्यां.
भारताची सगळ्यांत व्हडली बी टू बी सास (B2B SaaS) फिनटेक कंपनी पर्फीओसान (Perfeos) पीडब्ल्यूसी इंडियाच्या सहकार्यान 19 फेब्रुवारीक हो अहवाल जाहीर केलां. तातूंत भारतीय गिरायकांच्या वागणुकेचें विश्लेशण केलां. हातूंत 30 लाखां वयर तंत्रगिन्यानाची जाण आशिल्ल्या गिरायकांच्या खर्चाच्या वागणुकेचे परीक्षण केलां.
१. ईएमआयचेर खर्च
दर एका शारांतले लोक (ल्हान ते व्हड) आपल्या उत्पन्नांतल्यान 33% परस चड पयशे रिणाचे ईएमआय फारीक करपाक खर्च करतात.
२. अनिवार्य खर्च
चडशे पयशे घर भाडें, वीज बिलां आदी गरजेच्या खर्चाचेर खर्च जातात, जो वट्ट खर्चातलो 39% आसा. हाचे उपरांत 32% पयशे अन्न, पेट्रोल आदी गरजेच्या खर्चाचेर खर्च जातात. ते भायर 29% जिणे पद्दत आनी छंद संबंदीत खर्चाचेर खर्च जाता.
३. जिणे पद्दतीचो खर्च
जिणे पद्दतींतल्या खर्चांतली सगळ्यांत चड 62% फॅशन, खरेदी आनी वैयक्तीक जतनाय घेवपाच्या उत्पादनांचेर आसा.
४. अन्न आनी पेयांचो खर्च
लोकांचो पगार वाडत वता तशें भायले जेवप वा ऑनलायन जेवण ऑर्डर करप हांतूत खर्च चड जाता.
५. ऑनलायन गेमींग खर्च
20 हजार रुपया परस उण्या उत्पन्नाचे लोक ऑनलायन गेमींगाचेर चड खर्च (22%) करतात. उत्पन्न वाडटा तशें ऑनलायन गेमींगाचेर खर्च करपी लोकांचें प्रमाण उणें जाता. 75 हजार रुपयां परस चड उत्पन्न आशिल्ल्या लोकां मदीं हें प्रमाण फकत 12 टक्क्यां मेरेन उणे आशिल्लें.
६. पेमेंट पद्दत
गरजेच्या खर्चा खातीर सगळ्यांत चड वापरिल्ली पद्दत म्हळ्यार ईसीएस (इलॅक्ट्रॉनीक क्लियरिंग सर्विस). त्याच वेळार गरजेच्या आनी जिणे पद्दतीच्या खर्चा खातीर यूपीआय ही सगळ्यांत चड पसंत केल्ली पद्दत.
७. घर भाडें
टियर-2 शारांनी घरांचें भाडें टियर-1 शारांपरस 4.5% चड आसा.
८. वैजकी खर्च
टियर-2 शारांतले लोक टियर-1 शारांतल्या लोकां परस म्हयन्याक सरासरी 20% चड वैजकी खर्च करतात. टियर-1 शारांनी सरासरी वैजकी खर्च म्हयन्याक सुमार 2,450 रुपया आसा. तेच बरोबर महानगरांनी सगळ्यांत उणो वैजकी खर्च म्हयन्याक 2,048 रुपया आसा.
उत्पन्न आनी भूगोला प्रमाण डेटाचें विश्लेशण
० हो अहवाल मुखेलपणान फिनटेक कंपनी (देखीक ऑनलायन रिणां दिवपी अॅप्स), एनबीएफसी (नॉन-बँकिंग अर्थीक कंपनी) आनी हेर डिजिटल प्लॅटफॉर्म वापरून रिणां घेवप्यांचें विश्लेशण करता.
० ह्या गिरायकांक तीन भौगोलिक क्षेत्रांनी विभागले – 1. ल्हान शारां (टियर 3), 2. मध्यम शारां (टियर 2) आनी 3. व्हड शारां वा महानगरां (टियर 1).
० तशेंच तांचे उत्पन्न वेगळें आशिल्लें. कांय जाणांचें उत्पन्न 20 हजार रुपया परस उणें जाल्यार कांय जाणांचें उत्पन्न एक लाख रुपया परस चड आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
