भांगरभूंय | प्रतिनिधी
ओस्लो, खबरां संस्था : नॉर्वेचे संसदेन (स्टोर्टींग) खोल दर्यांतल्या खणकामाक मंजुरी दिल्या. हे फाटभूंयेर कोबाल्ट, तामें आनी जस्त सारकिल्ले धातू आनी खनीज दर्याच्या तळांतल्यान काडटले. ह्या धातूं वरवीं मोबायल- लॅपटॉप अशीं इलेक्ट्रॉनीक उपकरणां तयार करतले.
संसदेच्या ह्या निर्णया उपरांत पर्यावरण अभ्यासक आनी शास्त्रज्ञांनी विरोध सुरू केला. तांच्या मतान खोल दर्यांत वेवसायीक खाणकामाक लागून दर्यांतली जीण, जैवविविधताय आनी परिसंस्थेक गंभीर धोको निर्माण जाला.
खणकाम सुरू जातकच नॉर्वे हो संवसारांतलो पयलो देश जातलो जो दर्यांतल्यान मोलादीक धातूचें खणकाम करपाक परवानगी दितलो अशें ‘द गार्डियना’न म्हणलां. ही मान्यताय मेळ्ळ्या उपरांत आतां कंपनींक खोल दर्यांतल्या खण परवान्या खातीर अर्ज करपाक मेळटले. परवानो मेळ्ळ्या उपरांत खणकाम सुरू करूं येता.
यूएन- संलग्न इंटरनॅशनल सीबेड अथॉरिटीन (ISA) आतां मेरेन १४ देशांक फकत संशोधना खातीर खोल दर्यांत वचपाची परवानगी दिल्या. हातूंत भारत, चीन, रशिया, दक्षीण कोरिया, ब्रिटन, फ्रांस, पोलंड, ब्राझील, जपान, जमैका, नौरू, टोंगा, किरिबाटी आनी बेल्जियम हांचो आस्पाव जाता. भारत सरकारान २०२१ वर्सा ‘डीप ओशन मिशन’क मान्यताय दिल्या. दर्यांतल्या साधनांचो सोद घेवप आनी खोल दर्यांतल्या ऑपरेशनां खातीर तंत्रगिन्यानाची उदरगत करप हो ताचो हेत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
