भांगरभूंय | प्रतिनिधी
संवसारभर गुन्यांवकारी कृत्यां वाडत वचप हो एक खोलायेन अस्वस्थ करपी हुस्को जाला. तातूंतल्यान हो प्रस्न उप्रासता. आमी समाज म्हणून खंय वतात? दर दिसा आमी भयानक घडणुको आयकतात. बायलां आड गुन्यांव, अर्भकां लेगीत हातूंतल्यान सुटूंक नात आनी तरणाटे ड्रग्स, सोरो आनी जुगाराक बळी पडटात. हाका लागून तांचे फुडार फक्त मोडून पडना पूण पुराय राष्ट्राची प्रगती सकयल ओडून व्हरता.
आयच्या तरणाट्यां मदीं It’s my life, it’s my choice ही लोकप्रीय कल्पना आमकां धोक्याच्या मार्गान व्हरता. होंय, आमकां सगळ्यांक निवड करपाचें स्वातंत्र्य आसा, पूण त्या स्वातंत्र्या वांगडाच जापसालदारकी येता. देखीक- ड्रग्स घेवपाची निवड करप हो वैयक्तीक निर्णय दिसूं येता, पूण ताका लागून घरांतली शांतताय नश्ट जाता, नात्यांक लुकसाण जाता आनी समाजाक व्हड प्रमाणांत लुकसाण जाता. रिपलइफेक्ट जाता-एकल्या मनशाची चुकीची निवड केल्यार हेर जायत्या जाणांक दुख्ख भोगचें पडटा.
स्वातंत्र्य म्हणल्यार फक्त हक्क आसप न्हय; हेरांच्या हक्कांक मान दिवपाची गजाल. नैतिकता हीच खडप, जाचेर खरे स्वातंत्र्य उबें रावता. नैतीकमुल्यां नासतना लोक दुसर्याच्या हक्कां कडेन कुड्डे जातात आनी ताचे उपरांत अराजक निर्माण जाता. आमचे भोंवतणच्या लोकांचो स्वाभिमान आमी मान दितात आनी तिची राखण करतात अशें जिवीत जगपांत खरें स्वातंत्र्य आसा.
गोंया सारकिल्ल्या राज्यांनी शांतताये खातीर आनी सोबीतकायेक लागून नामना मेळिल्ल्या राज्यांनी हालींच्या काळांत गुन्यांव वाडिल्ल्यान सगळ्यांक धक्को बसला. मुळावें कारण स्पश्ट आसा: नैतीकमुल्यांचो उणाव. लोकांक बर्या-वायटाचीं मुळावीं तत्वां समजना असो समाज खंयच्याच प्रमाणांत कायद्याची अंमलबजावणी करपाक मेळना. नैतिकता घरांतल्यान सुरू जाता आनी फुडले पिळगेंत मुल्यां रुजोवप हें पालक, कुटूंब आनी समाज हांचेर थारता. दरेक व्यक्तीक बर्याची तांक आसता, पूण ह्या बरेपणाक पोसवण दिवपी वातावरण आमी तयार करपाक जाय.
आमच्या समाजाची नैतीक बुन्याद कुसकुसता हें आमी वळखुपाची वेळ आयल्या, आनी ती परतून बांदपाक आदार दिवप आमच्या दरेकाचेर आसा. म्हणटात तशें, बळिश्ट बुन्याद पुराय घराक आदार दिता आनी नैतीक शिक्षण ताच्या मुळाक आसूंक जाय.
आमचे भितर आनी आमच्या समाजांत घटमूट मुल्यां रुजोवन आमी गुन्यांव उणे जावपी, आदर फुलता आनी समाज फुलता अशा फुडाराची बुन्याद घालतात. ही घट्ट बुन्याद आशिल्ल्याक फुडली पिळगी अशा समाजांत वाडटली, जंय तरणाटे निर्धारीत, समर्पीत योगदान दिवपी, सगळ्यां खातीर सुरक्षीत, चड दयाळू संवसार उबारपाचेर लक्ष केंद्रीत करतात.
आमचे तरणाटे हे ह्या फुडाराचो कोनशाचो फातर. मुल्यां मुक्त मार्गान भटकले जाल्यार पुराय समाजाक आपले वांगडा व्हरतात. पूण तांकां घटमूट नैतीक बुन्याद घालून वाडयल्यार आदर, सहानुभूती आनी खर्या स्वातंत्र्याचेर बांदिल्लो फुडार आमी सुरक्षीत करतात. नैतिकता ही खर्या स्वातंत्र्याची कळ, आनी आमी हें सत्य शिकोवंक आनी जियेवंक सुरवात करपाची वेळ आयल्या. तेन्नाच आमकां असो समाज दिसतलो, जंय हक्कांचो फक्त दावोच न्हय तर ताचो भोवमान जाता.
सिमरन शेख
7058192404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
