भांगरभूंय | प्रतिनिधी
मडगांव : क्रिकेट खेळगडे आशिष नेहरा हांणी केळशीच्या रावपी घरा सयत ९ लाकडी कॉटेजी उबारपाची मागणी केल्या. सीआयझेडची परवानगी मेळिल्ल्यान आतां ११ सप्टेंबराक केळशी पंचायती वतीन सुवातेची पळोवणी करतले. ते प्रमाण हे विशीं पंचायती वतीन परवानगे विशीं निर्णय घेतले.
नेहरा हांणी केळशी लाकडी कॉटेजी सयत रावपा खातीर बांदकाम करपाची परवानगी केळशी पंचायतीकडेन मागल्या. केळशी पंचायती वतीन परवानगी मेळचे खातीर ११ जून २०२५ दिसा पंचायती कडेन पत्र वेव्हार केल्लो. तातूंत केळशी ९ लाकडी कॉटेजी आनी एक रावपा खातीर बांदकाम उबारपाची परवानगी दिवपाची मागणी केल्ली. पंचायती कडेन कॉटेजी खातीर मागणी केले उपरांत थळाव्यांनी हाका विरोध केल्लो. खंयचेय तरेन पर्यावरणाचें लुकसाण करीत कॉटेजीक परवानगी दिवची न्हय अशी मागणी केल्ली. ह्यान पयलीं नेहराचो केळशीचे जमनीवेलीं झाडां तोडिल्ल्यान आनी परवानगे बगर रस्तो केल्ल्यान बरोच बोवाळ जाल्लो. आतां परत एक फावट नेहरा हांचे वतीन हिमांशू जैन हांणी पंचायती वतीन परवानगी खातीर अर्ज केला.
मजगतीं, नेहरा हांच्या तात्पुरत्या कॉटेजीं खातीर गोवा कोस्टल झोन मॅनेजमेंट ऑथरिटी वतीन मंजुरी मेळ्ळ्या. हाचेर फाटल्या म्हयन्यांत केळशी ग्रामसभेंत चर्चा जाली. ताचेर सरपंच डिक्सन वाझ हांणी केळशी पंचायतीन आजूनय कसलीच परवानगी दिवंक ना. ते सुवातेर रस्तो बांदकाम आनी हेर पर्यावरणीय मुद्दे आशिल्ल्यान हे विशीं सीआरझेड मंडळा कडेन विचारतले. पत्यक्ष पळोवणे उपरांतूच फुडलो निर्णय घेतले आनी हाची सगली म्हायती ग्रामस्थांक दितले. खंयचोय निर्णय घेवचे पयलीं ग्रामसभेंत मांडटले. हाका लागून हे विशीं सगली म्हायती पारदर्शक दवरतले, अशें सरपंच वाझ हांणी स्पश्ट केल्लें.
आतां केळशी पंचायती वतीन नेहरा हांणी कॉटेज उबारपा खातीर परवानगी मागिल्ले सुवातेचे प्रत्यक्ष पळोवणे खातीर नोटीस जारी केल्या. ते प्रमाण पंचायत मंडळ, कागाळदारां सयत नेहरा हांचे वतीन नेमिल्ल्या मनशां सयत प्रत्यक्ष पळोवणी ११ सप्टेंबराक सकाळीं ११ वरांचेर करतले. हे विशीं संबंदीतांक पंचायती वतीन नोटीस धाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
