भांगरभूंय | प्रतिनिधी
मडगांवः नेसाय सांपडिल्ल्या अक्तर रजा (21) हाच्या खून प्रकरणांत मायणा कुडटरी पुलिसांनी संदीप गुप्ता (22) हाका अटक केल्या. घडणुकेचे सुवातेचेर खोलायेन तपास केले उपरांत दुबाविता आड गुन्यांव नोंद केलो.
नेसाय वाठारांतल्या खारजा कुशीक 17 नोव्हेंबराक कुशिल्ले स्थितींत रजाची कूड मेळिल्ली. पुलिसांनी 24 वरां भितर दुबावीत मूळ बिहारचो मात सध्या दिकरपाली रावपी संदीप गुप्ता हाका अटक केली. दुबावीत फाटलीं 16 वर्सां गोंयांत भुंसारी दुकान चलयता. रजा कडन आशिल्ले पयशे लुटपा खातीर दुबावितान ताचो खून केलो आनी ताची वळख पटची न्हय हे खातीर तकली फातर घालून चेंचली. दुबावितान सांगिल्ले प्रमाण खुना खातीर वापरिल्लीं हत्त्यारां आनी हेर साहित्य पुलिसांनी जप्त केलां. दक्षीण गोंय पुलीस अधिक्षक अभिषेक धानिया हांच्या मार्गदर्शना खाला एसडीपीओ मडगांव शिवेंदू भूषण हांच्या फुडारपणा खाला मायणा कुडटरी पुलीस स्टेशनाचे पुलीस निरिक्षक मोहन गावडे, मडगांव पुलीस स्टेशनाचे पुलीस निरिक्षक तुळशीदास नायक, कोलवें पुलीस स्टेशनाचे पुलीस निरिक्षक फिलोमेना कोस्ता, कुंकळ्ळी पुलीस स्टेशनाचे पुलीस निरिक्षक तुकाराम चव्हाण, फातोड्डें पुलीस स्टेशनाचे पुलीस निरिक्षक गिरेंद्र नायक, कुडचडें पुलीस स्टेशनाचे पुलीस निरिक्षक वैभव नायक आनी हेर पुलिसांनी ह्या प्रकरणाचो सोद लायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
