भांगरभूंय | प्रतिनिधी
2 लाखांचें लुकसाण
भांगरभूंय । प्रतिनिधी
मडगांव : नेसाय सां जुझे दी अरियालच्या उद्देगीक वसणुकेंतल्या (आयडीसी) सीहाथ कॅनींग कंपनीच्या नुस्तें प्रक्रिया आनी पॅकींग फॅक्टरीच्या कोल्ड स्टोरेजीक शेनवारा दनपारां उजो लागलो. ह्या उज्यांत फॅक्टरीचें सुमार 2 लाखांचें लुकसाण जालां. मडगांवां सयत कुंकळ्ळी आनी कुडचडेंच्या उजो पालोवपी दळान उज्याचेर नियंत्रण मेळयलें.
नेसायच्या उद्देगीक वसणुकेंतल्या नुस्तें प्रक्रिया आनी पॅकींग फॅक्टरीचे कुशीक नव्यान कोल्ड स्टोरेजीचें बांदकाम चालू आशिल्लें. थंय शेनवारा दनपारां 12.41 वरांच्या सुमाराक उजो लागपाची घडणूक घडली. हे घडणुकेची म्हायती मडगांव उजो पालोवपी दळाक दिली. त्याच वेळार उद्देगीक वसणुकेंतल्या उदकाचे मजतीन उज्याचेर नियंत्रण मेळोवपाचो यत्न लेगीत जालो, पूण उज्याची खरसाण अदीक आशिल्ल्यान तें शक्य जावंक ना. घडणुकेची म्हायती मेळटाच मडगांव उजो पालोवपी दळाचे बंब लेगीत घडणुकेचे सुवातेचेर पावले आनी तांणी उज्याचेर नियंत्रण मेळयलें.
कोल्ड स्टोरेजी खातीर बांदकाम करतना थर्माकोलाचे भितर गम लायताले. घडये वताक लागून थर्माकोलान पेट घेतला आसुंये, असो दुबाव आसा. उजो पालोवपी दळाच्या बंबाक येवपाक सुमार एक वर लागलें.
हाचे आदीं डिसेंबर 2025 त नेसाय आयडीसींतल्या केम- टेक फॅक्टरीक
उजो लागिल्लो. परतून परतून घडपी ह्या घडणुकांक लागून उद्देगीक वसणुकेंतलो सुरक्षेचो प्रस्न परतून एकदां साणीर आयला. थंय गरजेची उदकाची वेवस्थाना तशेंच रेल्वे गेटी कडल्या उणें उंचायेचे बॅरियराची आडखळ आसा. सरकारान हाचेर लक्ष दिवचें, अशी मागणी थळावे ट्राव्हासो हांणी केल्या.
रेल्वे गेटी कडल्या बॅरियराची बंबाक आडखळ
नेसायच्या रेल्वे मार्गा वयल्या व्हड गाडयां खातीर उणे उंचायेचे बॅरियर घातल्यात. ताका लागून मडगांव उजो पालोवपी दळाच्या बंबाक थंय आयले उपरांत मुखार वचपाक मेळना. ते खातीर सुमार 10 किलोमिटर अंतराचो भोंवताडो मारून उज्याचे सुवातेर येवचें पडलें. ताका लागून हो कळाव जालो, अशें उजो पालोवपी दळाचे अधिकारी गील सुझा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
