भांगरभूंय | प्रतिनिधी
वास्को: 35 व्या नेव्हल हायर कमांड कोर्सचो समारोप सुवाळो नेव्हल वॉर कॉलेज वाठारांत उमेदीन जालो. भारतीय नौदळाचे पंचवीस अधिकारी, भारतीय लष्कर आनी भारतीय वायुसेनेचे दरेकी चार अधिकारी, तटरक्षक दळाचो एक अश्या 34 अधिकार्यांनी हो कोर्स पुराय केलो.
1 ऑगस्ट 22 दिसा हो कोर्स सुरू जाल्लो. हो फ्लॅगशिप कोर्स आशिल्ल्यान, जातूंत भारतीय नौदळाचे कॅप्टन आनी लष्कर, वायुसेना, भारतीय तटरक्षक दळाचे समकक्ष श्रेणीचे अधिकारी वांटेकार जातात. राष्ट्रीय सुरक्षा, दर्याची रणनीती, जोड मोहीम आनी तंत्रज्ञानांतल्या परिवर्तनांचेर मुळावें लक्ष केंद्रीत करप. ते वरवीं धोरणात्मक आनी ऑपरेशनल पांवड्यार नेतृत्वा खातीर अधिकारी तयार करप हो ह्या कोर्साचो हेत जावन आसा. ह्या अभ्यासक्रमा वरवीं वांटेकार जाल्ल्या अधिकार्यांनी सामान्य राष्ट्रा खातीर आनी विशेश सशस्त्र दळा खातीर धोरणात्मक आनी ऑपरेशनल म्हत्व आशिल्ल्या विवीध विशयांचेर संशोधन केलें.
गोंयचे राज्यपाल श्रीधरन पिल्लई हे सुवाळ्या वेळार मुखेल सोयरे तशेंच सदर्न नेव्हल कमांडचे फ्लॅग ऑफिसर कमांडिंग-इन-चीफ व्हाईस अॅडमिरल एम.ए.हंपी होली हे हाजीर आशिल्ले. वांटेकारांक संरक्षण आनी धोरणात्मक अभ्यास ह्या विशयाचेर पद्वी प्रमाणपत्रां भेटयलीं. कॅप्टन राजीव तिवारी हांकां उत्कृश्ठ प्रबंधा खातीर नौदळ मुखेलीचें भांगराळें पदक, दुसरें उत्कृश्ठ प्रबंधा खातीर कॅप्टन विक्रम आहुजा हांकां रुप्या पदक भेटयलें. कॅप्टन कुणाल भारद्वाज हांकां उत्कृश्ठ ऑपरेशन रिसर्च पेपरा खातीर रुप्या पदक, जाल्यार कॅप्टन वरुण पणीकर आनी कर्नल आरआर लड्ढा हांकां दुसर्या उत्कृश्ठ प्रबंधा खातीर रुप्या पदर भेटयलें. मोस्ट स्पिरिटेड ऑफिसर खातीर पयल्या चीफ ऑफ डिफेन्स स्टाफाचे यादीन नवीच स्थापन केल्ली जनरल बिपीन रावत ट्रॉफी कॅप्टन सूरज जेम्स राबेरा हांकां भेटयली. ह्या वेळार नेव्ही वेल्फेअर अॅण्ड वेलनेस असोसिएशनाची अध्यक्ष कला हरी कुमार, दक्षीण मळार नेव्ही वेल्फेअर अॅण्ड वेलनेस असोसिएशनाची अध्यक्ष मधुमती हम्पीहोली तशेंच सर्गेस्त जनरल बिपीन रावत हांची धूव लेगीत हाजीर आशिल्ली.
राज्यपाल पिल्लाई हांणी पदक जैतिवंतांक परबीं भेटयलीं आनी अधिकार्यांचे उत्कृश्ठताये विशीं तांची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
