भांगरभूंय | प्रतिनिधी
विरेश बोरकार हांच्या प्रस्नाक मुख्यमंत्र्यान दिली जाप
पणजी : राज्य विधानसभेच्या अर्थसंकल्पीय अधिवेशनाची आयज सोमारा २४ मार्चाक सुरवात जाली. मजगतीं आयज विधानसभेंत आमदार विरेश बोरकार हांणी नव्या नेवरा रेल्वे स्टेशनाचो मुद्दो मांडलो. ह्या वेळार रेल्वे प्रकल्पांच्या मुद्यावेल्यान मंत्री मॉवीन गुदिन्हो आनी रिव्हॉल्युशनरी गोवन्स पक्षाचे आमदार विरेश बोरकार एकामेका मुखार आयले. करमळी रेल्वे स्टेशनाचेर कितल्यो गाडयो येतात, हांगच्या स्टेशनाचो फुटफॉल कितलो? हाच्यो जापो मंत्र्यांनी दिवच्यो अशें आमदार बोरकार हांणी म्हणलें.
‘ह्या प्रस्नाची जाप कोकण रेल्वेचे अधिकारी दिवपाक शकतले. आनी फाल्यां गाडी उसरां आयल्यार, गाडी कित्याक उसरां आयलीं हो प्रस्न म्हाका विचारतले?’ अशें मंत्री मॉविन गुदिन्हो हांणी म्हणलें.
मजगतीं हातूंत मुख्यमंत्र्यांनी मोर्चा संभाळीत आमदार बोरकरांक जाप दिली. मुख्यमंत्र्यान म्हणलें, राज्याच्या रस्त्यांवेले येरादारीचो ताण उणो करपा खातीर पेडणें ते काणकोणां मेरेन बेगोबेग रेल्वे सुरू जावप गरजेचें. हाका लागूनच नेवरा क्रॉसींग स्टेशन येवप गरजेचें, अशें मत मुख्यमंत्री डॉ. प्रमोद सावंत हांणी मांडलें.
मजगतीं, करमळे रेल्वे स्टेशनाचेर चडांत चड रेल्वे थारचे खातीर केंद्रीय रेल्वेमंत्र्यां कडेन चर्चा करतलों, अशें आस्वासन मुख्यमंत्र्यांनी ह्या वेळार दिलें आनी अशें जाल्यार गोंयांत येवपी पर्यटकांक पणजे आनीकय सोपें जातलें. तशेंच ताचो फायदो टॅक्सी वेवसायिकांकूय जातलो. नेवरा क्रॉसींग रेल्वे स्टेशन येवपाचो आसा आनी फायदो पुराय गोंयांक जातलो, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
