भांगरभूंय | प्रतिनिधी
दरेक बायलेक सोबीत दिसपाक आवडटा. हे खातीर ती जायत्या तरांनी सोबीतकाय तिगोवन दवरपाचो यत्न करतात. चडशीं बायला हात सोबीत दिसपा खातीर वॉक्सिंग, मेडिक्युअर करतात. तशेंच हात सोबीत दिसपाचो सगळ्यांत सोपो मार्ग म्हणल्यार नेल पॉलिश लावप. चलयो जायत्या वेळार नाखटांचेर वेगवेगळ्या रंगाची नेल पॉलिश लायतात. नेल आर्ट डिझायन करून हाताची सोबीतकाय वाडयतात. पूण ह्या सोबीत नेल पॉलिशांत भलायकेक धोको निर्माण करपी हानीकारक केमिकल्स आसतात.
नेल पॉलिश लावप भलायके खातीर धोक्याचे…
नेल पॉलिश वापरप भलायकेक हानीकारक थारूंक शकता. नेल पॉलिशांत जायते केमिकल मेळटात. जशें फॉर्मल्डिहाईड, टोल्युईन आनी डिप्रोपाईल फॅथलेट हीं सगळीं केमिकल्स खूब हानीकारक आसतात. सतत आनी चड काळ वापरल्यार कातीचेर ॲलर्जी, सुज आनी तांबडेपण सारकिल्ले त्रास जावंक शकतात. नेल पॉलिश रिमूव्हरांत लेगीत हानीकारक केमिकल्स भरिल्ले आसतात. ताच्या वापराक लागून कात सुकूं येता. कातीची सैमीक तेलकटताय उणी जाल्ल्यान संसर्ग आनी बॅक्टेरियाचो धोको वाडटा.
स्वास घेवपाची समस्या
तेभायर नेल पॉलिशांतले केमिकल्स श्वसन तंत्राचेर परिणाम करतात. देखून नेल पॉलिश लायतना वा काडटना मास्क घालप गरजेचें. तशेंच ट्रायफेनील फॉस्फेट पुलमांवांक हानिकारक आसता. ताका लागून पुलमांवांत सुज येता जाका लागून स्वास घेवपाक कठीण जाता. आनी दमो सारकिल्ले दुयेस जावंक शकतात.
गुरवार बायलांक हानीकारक
नेल पॉलिशांतले केमिकल गुरवार बायलांक आनीकय धोक्याचे थारूंक शकतात, कारण ते गर्भाक पावूंक शकतात. देखून गुरवार बायलांनी नेल पॉलिश न वापरप गरजेचें. ते खातीर सैमीक घटक आशिल्ली नेल पॉलिश वापरचे.
मेंदवाचें नुकसान
नेल पॉलिशांत टोल्युईन, फॉर्मल्डिहाईड आनी डायथिल फॅथलेट हीं केमिकल्स आसतात. कुडीच्या हेर खंयच्याय भागा प्रमाण हीं केमिकल्स मेंदवाक वतात. ह्या केमिकल्सांक लागून मेंदवाच्या पेशींक इबाड जावंक शकता. हें केमिकल्स मेंदवांत रगत परिसंचरणांत बादा हाडटा. ताका लागून खर तकली दुखूंक शकता. तशेंच जायत्या जाणांक नेल पॉलिशाक लागून मळमळ आनी उलटी जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
