भांगरभूंय | प्रतिनिधी
भावंडांनो,
आमच्या देशाचे राष्ट्रपिता मोहनदास करमचंद गांधी म्हणल्यारुच ‘महात्मा’ गांधी. ह्याच नांवान तांकां पुराय देश तशेंच संवसार वळखतालो. राष्ट्रपिता म्हूण वळखुपाक भावंडांनो तांच्यात तशे गूण आशिल्ले. देश भावंडां खातीर ते जे तरेन वावुरले, तांणी आपली जीण ओंपली वा तांणी आपले आचार-विचार, वागणूक, चलणूक दवरली, अहिंसेचो मार्ग आपणालो आनी देशभावंडांची सेवा केली त्याच गुणा वरवीं ते सगल्या भारतीयांक तशेंच संवसाराक आदर्श थारले. ‘महात्मा’ थारले. तांच्या विचारांची देख दरेकलो घेत रावलो. भावंडांनो, आमच्या महात्मा गांधी उपरांत अशी उपाधी, असोच मान, कोणाक फावो जाला तें जाणांत तुमी? हय. महात्मा ज्योतिबा फुले. पूण आयज अशेच ‘महात्मा’ म्हूण पुराय संवसारभर गाजिल्ले आनीक एक व्यक्तीमत्व तुमचे नदरे मुखार हाडूंक सोदता, ते म्हळ्यार 20 व्या शेंकड्याच्या उत्तरार्धांतले म्हान क्रांतीकारी नेल्सन मंडेला. हय भावंडांनो, पुराय संवसारान तांकां ‘दुसरे महात्मा’ म्हूण वळख दिली. तांकां मानले. आपणाल्या काळजांत मानाची सुवात दिली. त्या म्हान फुडार्याची ह्या सप्तका अखेर जयंती मनयतना आमी तांचो उगडास करुया आं.
भावंडांनो, नेल्सन मंडेला हे ‘थेंबू’ ह्या आदिवासी जमातींत एका ल्हानशा खेड्यांत जल्माक आयले. दक्षीण आफ्रिकेंतल्या गोर्या लोकांची वर्णदुस्वासी राजवट मंडेला हांच्या फुडारपणा खाला आफ्रिकन नॅशनल काँग्रेस हे संघटणेन सोंपयली आनी सरकार मंडेला हांच्या हातांत आयलें. त्या वेळा वयले परिस्थितींतय धाडसान, संयमान आनी अहिंसेच्या तत्वान प्रस्थापितां आड झुजपी ह्या म्हान मनशाक महात्मा गांधीचे वारसदार म्हूण लोक मानूंक लागले. तांचे जिवीत भोंवतणच्या संवसाराक उर्बा दीत रावले.
आपल्या हांसत्या मुखान तशेंच ‘जालें तें विसरा आतां’ अशें मायेमोगान सांगून विरोधकांक जिखपाचें शस्त्र तांचे कडेन आशिल्लें. अंदमानांतल्या रॉबन जुंव्याचेर तांणी काळखे कुडींत भोगिल्ली बंदखणीची 27 वर्सांची ख्यास्त पुराय संवसाराक खबर आसा. मंडेलाच्या त्या त्यागा वरवींच वर्ण दुस्वासी सरकाराक सत्ते वेल्यान देंवचें पडलें. 1993 वर्सा शांततायेचो नोबॅल पुरस्कार फावो जाल्ले मंडेलाची दक्षीण आफ्रिकेचे राष्ट्राध्यक्ष म्हूण निवड जाली. पांच वर्सांच्या काळा उपरांत तांणी राजकारणांतल्यान निवृत्त जावन समाजकार्यांत व्हांवन घेतलें. तांचे सेवे वरवीं शंबर परस चड पुरस्कार आनी भौमान फावो जाले. तातूंतल्यानच उबारिल्ल्या नेल्सन मंडेला फावंडेशना वरवीं तांणी समाजकार्य नेटान चालू दवरलें. आपल्या राष्ट्राध्यक्षपदाच्या पगारांतल्यान कांय रक्कम वेगळी काडून दवरिल्ल्या पयशांतल्यान तांणी नेल्सन मंडेला चिल्ड्रन फंड जोड संस्था उबारली. 2002 वर्सा तांची नात आनी दोन पुतणयांक एड्सा वरवीं मरण आयिल्ल्यान तांणी एड्सा आड लढो दिवपाचें थारायलें. उपरांत तांचो चलो जो वकील आशिल्लो ताकाय एड्साच्या दुयेंसान मरण आयलें. देखून तांणी एड्सा आडच्या वावरा खातीर ‘46664’ ही संस्था उबारली.
समाज प्रबोधन तशेंच दुयेंतीच्या उपचारा खातीर व्हड निधी उबारपा खातीर संवसारांतल्यो व्हड कंपनीं तशेंच म्हालगडे कलाकार ‘46664’ हे संस्थे खातीर स्वताचे इत्सेन वावरूंक लागले. ‘आयुश्य’ हें फक्त ‘काळे’ वा ‘गोरे’ आसता अशें ना. तांचे मदींय वेगळ्यो ‘तरा’ आसतात. ‘हुकुमशाहा’ भितरय ‘मनीसपण’ आसता. तांचे भितरय वेगळे गूण आसता’ अशें सांगीत ते जिविताचेर उजवाड घाली.
नेल्सन मंडेलाक सगल्या मळांचेर वावुरचेली आवड आशिल्ली. पुराय वेळ ते समाजा खातीर वावुरपाक दिताले. संवसारांतल्या ह्या आदरणीय मनशाक लोकांनी आपल्या काळजांत सुवात दिल्ली. ताका ते पुजताले. दक्षीण आफ्रिकेक स्वतंत्रतायेची फांतोड पळोवपाक दिवपी ह्या म्हान फुडार्याची 18 जुलयाक जयंती. ते निमतान भावंडांनो आमी तांची मुजरत याद काडून तांचे मुखार नतमस्तक जावया आं…
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
