भांगरभूंय | प्रतिनिधी
म्हापशें : नेरूल पुला लागसार भौशीक बांदकाम खात्याचे जमनी वयलीं रायट ऑफ वे (आरओडब्ल्यू) खाला येवपी आनी अतिक्रमण थारपी नुस्तें मार्केटा सयत 31 दुकानां भौशीक बांदकाम खात्यान अतिक्रमण हटाव पंगडाच्या आदारान मातये भरवण केलीं. सर्वोच्च न्यायालयाचे रस्तो सुरक्षा समितीन घेतिल्ल्या निर्णयाच्या आदारान ही कारवाय केली.
भौशीक बांदकाम खात्यान डिसेंबर 2024 त भौशीक नोटीस जारी करून सुनील गोवेकार, समीर (दाभोलकार) शिरोडकार, अनंत गोलतेकार, गोविंद चोपडेंकार, सर्वेश दाभोलकार, वासुदेव मडगांवकार, संजय कळंगूटकार, समीर कळंगूटकार, वासुदेव कळंगूटकार, प्रमिला पणजीकार, सागर पणजीकार, अविनाश शिरोडकार, राजेंद्र मडगांवकार, केनेत फर्नांडीस, राजेश नायक, प्रकाश होबळे, नुस्त्या मार्केट समिती, शशिकला गोवेकार, सुलक्षा गोवेकार, समीर आगरवाडेकार, स्वप्नील आगरवाडेकार, सदानंद आगरवाडेकार, सुंदर आगरवाडेकार, अली शेख, प्रशांत खांडेपारकार, गीता शिरोडकार, चंद्रावती बाणावलीकार, शनया टेलर, मिलाग्रीन नाझारेथ, प्रज्योत कळंगूटकार आनी कुमार माशेलकार हांकां तांची अतिक्रमणां थारपीं बांदकामां स्वता जावन काडपाचे निर्देश दिल्ले.
भौशीक बांदकाम मालकीचे जमनीर अतिक्रमण केल्ल्या ह्या बांदकामांक हे आदीं आडायल्ली सुवात रिती करपाचे निर्देश दिल्ले. ह्या अतिक्रमणांचो वाहन चालक आनी चलत वचपी लोकांक आडखळ जाता. हो मुख्य जिल्हो रस्तो (एमडीआर) आसा. रस्त्याचें रुंदीकरण 25 मिटर करपाची येवजण आसा. ताका लागून 15.5 मिटरां भितर हीं दुकानां आरओडब्ल्यूंत येतात, अशी नोंद केल्ली. मात ह्या नोटिशीं कडेन संबंदितांनी आडनदर केल्ल्यान फाटल्या डिसेंबरांत भौशीक बांदकाम खात्यान अंतीम सुचोवणी नोटीस जारी केल्ली. तरी लेगीत संबंदितांनी ह्या अंतीम 15 दिसांचे नोटिशे कडेन आडनदर केल्ली. बुधवारा 16 एप्रीलाक सकाळीं भौशीक बांदकाम खात्याच्या अधिकाऱ्यांनी अतिक्रमण हटाव पंगडाचे मजतीन पुलीस बंदोबस्तांत हीं दुकानां तशेंच नुत्यां मार्केट मातये भरवण केलें. ह्या वेळार बार्देस मामलेदार हाजीर आशिल्ले. अधिकाऱ्यांनी पयलीं संबंदितांक दुकानांतलें सामान काडपाक वेळ दिलो आनी ते उपरांत जेसीबीच्या आदारान अतिक्रमणां मोडपाची कारवाय हातांत घेतली. कांय जाणांनी स्वता जावन दुकानां काडलीं.
आतां नुस्तें खंय बसून विकपाचें? : नुस्तेकार
थळावे नुस्तें वेवसायीक अविनाश शिरोडकार आनी हेरांनी हे कारवाये वेळार नुत्यां मार्केट मातये भरवण केल्ले खातीर खर नाराजी उक्तायली. कारण हें नुस्त्यां मार्केट रस्त्या पसून 25 मिटरां परस चड अंतराचेर आशिल्लें. सरकारान नेरूल गांव फिशरमन झोन म्हूण घोशीत केला. तरी लेगीत आमचें नुत्यां मार्केट मोडलें. आतां आमी नुस्तें मारून तें खंय बसून विकपाचें? आमच्या पोटाचो प्रस्न निर्माण जाला, अशें शिरोडकार हांणी सांगलें.
हॉटेलाक जमीन दिवपाचो यत्न : थळावे लोक
थळाव्या नुस्त्याकान्नींची गैरसोय जावची न्हय हे खातीर आदली सरपंच शशिकला गोवेकार हांणी 25 वर्सां आदीं हें मार्केट बांदून दिल्लें. दुकानां मोडलीं हाचें दुख्ख ना, पूण आमचें मार्केट मोडिल्ले खातीर दुख्खी जाल्यात. ह्या नुस्त्या मार्केटाचे कुशीक व्हड व्हड हॉटेल प्रकल्प आयल्यात. ह्या बिगर गोंयकार वेवसायिकांच्या प्रकल्पांक सीआरझॅड लागू जायना, तो फक्त थळाव्यां लोकांकूच लागू जाता? ही कारवाय म्हणल्यार ह्या हॉटेल प्रकल्पांक जमीन मेकळी करून दिवपाचो यत्न, असो आरोप थळाव्या लोकांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
