भांगरभूंय | प्रतिनिधी
ब्राझिलाचो नामनेचो फुटबॉल खेळगडो नेमार दोन वर्सां खातीर सावदी अरेबियाच्या अल हिलाल क्लबा कडल्यान प्रो लीग खेळटलो.
अल हिलाल क्लबान फ्रॅंच क्लब पीएसजी वांगडा 9.8 कोटी डॉलरांनी (सुमार 818 कोटी रुपया) ट्रान्सफर डील केल्या. ही रक्कम नेमारा खातीर सावदी अरेबिया क्लब पीएसजीक दितलो. नेमाराचें मानधन वेगळें आसा.
नेमाराक दोन वर्सां खातीर सुमार 30 कोटी डॉलर इतकें मानधन मेळटलें. म्हणल्यार वर्साचें मानधन 15 कोटी डॉलर (सुमार 1247 कोटी रुपया) आसा. दोन वर्सां उपरांत नेमार क्लब सोडपाक स्वतंत्र आसतलो. पूण, ताका दिसता जाल्यार तो कबलात मुखार वाडोवपाक शकता.
नेमाराक मानधना खेरीत अतिरिक्त भत्ते आनी हेर खर्चा खातीर रक्कम मेळटली. सावदी अरेबियांत ताका प्रायव्हेट जेट आनी खाजकी बंगल्याची सुविधा मेळटली. तशेंच अल हिलालाच्या दरेक जैता खातीर सुमार 72 लाख रुपयांचो बोनस लेगीत मेळटलो. तशेंच मिडियांत सावदी अरेबियाक प्रोमोट करपा खातीर दरेक पोस्टा खातीर सुमार 4.5 कोटी रुपया मेळटले.
नेमार सध्या फ्रॅंच क्लब पॅरीस सेंट जर्मन (पीएसजी) वतीन खेळटालो. ताणें सावदी अरेबियांत खेळपाक मेळचें म्हणू पीएसजी कडली कबलात सोंपयल्या. नेमारान 2017त पीएसजी कडेन सुमार 2000 कोटी रुपयांनी कबलात केल्ली. तो स वर्सां मेरेन क्लबा वांगडा आशिल्लो.
31 वर्सां पिरायेच्या नेमारान 173 मॅचींनी 118 गोल केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
