भांगरभूंय | प्रतिनिधी
अॅड. कार्लुस फेरेराः किटला उपभलायकी केंद्रांत ओपीडी सुरू
भांगरभूंय । प्रतिनिधी
म्हापशें: समस्या उप्रासले उपरांतूच दोतोरां कडेन वा हॉस्पिटलांत वचूं नाकात. नेमान भलायकेची तपासणी ही एक संवय जावपाक जाय. जे वरवीं एकादी समस्या रोखडीच कळ्ळी जाल्यार ती व्हडार पडचे आदींच ताचेर योग्य उपचार करपाक मेळटले, अशें हळदोणेंचे आमदार अॅड. कार्लुस फेरेरा हांणी सांगलें.
शेनवारा किटला उपभलायकी केंद्र आनी ओपीडीचें उक्तावण केले उपरांत अॅड. फेरेरा उलयताले. ह्या वेळार भलायकी अधिकारी डॉ. रोशन नाझारेथ, पंच सुभाष राऊत आनी हेर मानेस्त हाजीर आशिल्ले.
आमची जीवनशैली बदलत आसा. तेचवरी आमच्यो खाणां जेवणाच्यो संवयी लेगीत बदल्ल्यात. आमचे पुर्वज निरोगी आसताले आनी लांब आयुश्य जियेताले. कारण ते शेतां- भाटांनी वताले, थंय काम करताले. लोकांनी आपले भलायकेची जतनाय घेवपाचेर भर दिवचो. ते खातीर तांणी नेमान भलायकेची तपासणी करप गरजेचें आसा, अशें अॅड. फेरेरा हांणी सांगलें.
किटलाच्या लोकांनी गांवांत ओपीडीची वेवस्था करची, अशी मागणी केल्ली. ते प्रमाण आपले विनवणे वयल्यान 15 दिसां भितर ताकतिकेन ओपीडी सुरू केल्ले खातीर हळदोणे भलायकी केंद्राचे भलायकी अधिकारी डॉ. रोशन नाझारेथ हांचें अॅड. फेरेरा हांणी कवतूक केलें. पंच सुभाष राऊत हांणी सांगलें, किटला गांवांत उपभलायकी केंद्र सुरू जावचे हे खातीर आपणे खूब वर्सां आदीं प्रस्ताव दिल्लो. पूण ते उपरांत कांयच जावंक ना. आतां कांय म्हयन्यां भितर आमदार अॅड. फेरेरा हांणी तें सुरू केल्ले खातीर आपल्याक खोस जाल्या, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
