भांगरभूंय | प्रतिनिधी
रशियेचो इयान नेपोम्नियाशी आनी चीनाचो डिंग लिरेन हांचे मदलो संवसारीक बुद्दीबळ वस्तादपण सर्तींतलो इकरावो डाव बादाबाद रितीन सोंपलो. इकरा डावा उपरांत नेपोम्नियाशी 6-5 असो मुखार आसा. ताका वस्तादपण जोडपाक आतां फकत 1.5 गुणांची गरज आसा.
धव्या घुलांनी खेळपी नेपोन लिरेनाक मॅचींत येवपाची संदच दिली ना. सर्तींतलें आव्हान कायम राखपाक लिरेनाक एक जैत सामकें गरजेचें आसा. आतां फकत तीन डाव बाकी आसात आनी तातूंतल्या दोन डावांनी लिरेन धव्या घुलांनी खेळटलो.
नेपोन राय लोपेझ ओपनिंगाचो क्लोस व्हॅरिएशन खेळटना आठवे चालींत हतयाचे मुखा वयली घूल एक घर चलून तीन वर्सां पयलीं लिरेना आड खेळयिल्ल्या डावाची पुनरावृत्ती करपाचो यत्न केलो. त्या डावांत नेपोन जैत जोडिल्लें. पूण, लिरेनान चाल बदलून जाप दिली आनी सेगीत घुलांची अदलाबदली केली आनी अखेरेक 39वे चालींत दोनूय ग्रॅण्डमास्टर डाव बादाबाद दवरपाक तयार जाले. आतां एका दिसाच्या विसवा उपरांत दोन फेरयो जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
