भांगरभूंय | प्रतिनिधी
रशियेचो इयान नेपोम्नियाशी आनी चीनाचो डिंग लिरेन हांचे मदलो संवसारीक बुद्दीबळ वस्तादपण सर्तींतलो णववो डाव बादाबाद रितीन सोंपलो. ह्या डावा उपरांत नेपोम्नियाशी 5-4 अशा फरकान मुखार आसा. पूण, लिरेन एक जैत जोडता जाल्यार सर्त परतून बरोबरीचेर येतली.
णववे फेरयेंत धव्या घुलांनी खेळपी नेपोम्नियाशीन रुय लोपेझ ओपनींग वरवीं लिरेनाचेर शेक दवरपाचो यत्न केलो. पूण, एकदाय स्थिती लिरेनाच्या हाता भायर वचूंक ना. अखेरेक नेपोम्नियाशीन घोडे आनी दोन घुलांच्या खेळांत प्रतिस्पर्धी खेळगड्याचेर अखेरचे खेपे चेपण हाडपाचो यत्न केलो. पूण, ताका येस मेळूंक ना आनी 82 चाली उपरांत डाव बादाबाद रितीन सोंपलो. एका दिसाच्या विसवा उपरांत सेगीत दोन दीस 10वो आनी 11वो डाव जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
