भांगरभूंय | प्रतिनिधी
नेपाळ सध्या धगधगता. मनशाचे सोंशिकसाणेचो अंत जालो काय तो पेटून उठटा. तशेंच नेपाळांत जालां. सरकारान सोशल मिडिया बंद केले तें निमित्त जालें. मात, म्हारगाय, भ्रश्टाचार, गैरकारभार, वशिलो, गरिबी सगलेंच एक जालें आनी तरणाट्यांची तिडक मस्तकाक पावली. श्रीलंके उपरांत इंडोनेशिया आनी आतां नेपाळ. लोकप्रतिनिधींचेर लोकांनी हल्लो केलो. तांचीं घरां, संसद भवन, कोर्ट लासलें. एका केंद्रीय मंत्र्याक तर तरणाट्यांचो प्रसाद खावचो पडलो. प्रधानमंत्री ओलीन लश्कर मुखेल्याक कारवायेचो आदेश दिल्लो. पूण तांणी उरफाटो ओलींक राजिनामो दिवपाक लायलो. ओली खंय तरी गायब जाल्यात. आतां फुडल्या सप्तकांत सरकारान आंदोलकांक भासाभास करपाक आपयल्यात. पूण, तरणाट्यांची मागणी सरकारान राजिनामो दिवचो. ह्या हिंसाचारांत पन्नासां वयर तरणाट्यांक मरण आयलां. तर चारश्यां वयर जखमी जाल्यात. हे घडणुके फाटल्यान सोशल मिडियाच आसा, अशें कांय जाणांचो दावो. 26 अॅप्स बंद केल्ले. मात काल सकाळीं ही बंदी फाटीं घेतली. फक्त सोशल मिडियाक लागून हें जालां जाल्यार ताचें तरणाट्यांक वेसन लावपांत पश्चिमी देश यशस्वी थारल्यात, हें सिद्ध जालें म्हणपाचें.
नेपाळ देश ओडिशा परस आठ हजार चौ. किमी ल्हान. लोकसंख्या 3 कोटी. केरळाची लोकसंख्या तांचे परस 30 लाख चड. अदमासान 80 लाख ते 1 कोटी नेपाळी नागरीक भारतांत रावतात. उक्ती शीम कबलाती खातीर तांकां व्हिसा, पासपोर्टा बगर जाय तितले दीस रावपाक, शिकपाक, नोकरी करपाक मेळटा. हे लोक कश्टी. गुन्यांवकारी मळाचेर ते सहसा दिसनात. भारतीय 10 हजार रुपया नेपाळांत वतकच 16 हजार नेपाळी रुपया जातात. नेपाळांत सगले दोंगर, म्हणटकच चड उदरगत जावंक ना. कांय कडेन गाडी पसून व्हरपाक मेळना. लोकप्रतिनिधींचीं घरां भरून दारां ओत्तात. देखून तरणाट्यांचो खदखद भायर सरलो. सरकाराच्यो नोंदणी अटी पाळूंक नाशिल्ल्यान अॅप्सांचेर बंदी घाल्ली. पूण तरणाट्यांक हो निर्णय अभिव्यक्ती स्वातंत्र्याचेर हल्लो दिसलो. नेपो किड ट्रेंड सोशल मिडियाचेर पातळिल्ल्यान पयलींच तरणाट्यांची तकली तापिल्ली. (नेपो कीड म्हणल्या आवय- बापायचे पुण्यायेचेर संद मेळिल्ले तरणाटे. खास करू सिनेमा, खेळ आनी राजकी मळा वयले) नेपाळांत राजकी फुडाऱ्यांच्या तरणाट्यांची कर्तुबां, झेत सोशल मिडियाचेर गाजताले, ताणें उज्यांत तेल ओतलें. वशिलेबाजी, भ्रश्टाचार, टक्केवारी, अपारदर्शकताय ह्यो राजकी मळा वयल्यो सदच्योच गजाली… तीय तिडक वयर सरली.
आतां सरकारान चर्चेची तयारी दाखयल्या. अभिव्यक्ती स्वातंत्र्य आनी सरकारी पारदर्शकताय हाचेर आंदोलकांनी चड भर दिला. तरणाट्यांनी फुडाऱ्यांक बुद्द शिकयली, हें खरें आसलें तरी हिंसाचार हो ते खातीरचो मार्ग न्हय. कायद्यानूय तें योग्य न्हय. सरकारानूय लाठीमार, रबरी गुळयो मारल्यो. तातूंत कांय जाणांक मरण आयलें. सरकारान आंदोलकांचें आयकून घेवंक जाय आसलें. सोशल मिडियाचेर बंदी घालचे पयलीं विचारपाक जाय आसलें. आतां तपास समिती केल्या. हें वराती फाटल्यान घोडें असलो प्रकार जालो.
आतां हे घडणुकेन नेपाळांत राजकी अस्थिरताय निर्माण जाल्या. थोड्यांक थंय निर्धमी देश जाय, थोड्यांक धर्मीक. थोड्यांक कम्युनिस्टांचो मोग. फाटल्या 17 वर्सांच्या काळांत थंय 14 सरकारां आयल्यांत. एकलेंय पांच वर्सां तिगूंक ना… आनी आतां हो प्रकार. शिक्षण आनी रोजगाराच्यो संदी वाडच्यो, अशी तरणाट्यांची मागणी आसा. उठसूठ भारतांत येवप नव्या तरणाट्यांक पसंत ना. सगले कडेन दोंगर, देगणां आसलीं तरी उदरगत करुंक मेळटा. नेपाळ सरकाराक हें शक्य ना? सगलेच देश तांकां मजत करपाक तयार आसात.
सध्या राष्ट्रपती रामचंद्र पौडेल हांणी हातांत सुत्रां घेतल्यांत. थंय ते रामराज्य हाडपाक यशस्वी थारतले?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
