भांगरभूंय | प्रतिनिधी
संवसारीक टी-20 क्रिकेट सर्तींतल्या डी गटांतले मॅचींत दक्षीण आफ्रिका पंगडान नेपाळाक अखेरच्या बॉलाचेर हारोवन आपली लज वाटायली. अखेरच्या बॉलाचेर नेपाळाक दोन धांवड्यांची गरज आशिल्ली. पूण, हॅन्रिक क्लासेनान गुलशन झाक धांवबाद केलो. दक्षीण आफ्रिकेच्या जैतांत स्पिनर तबरेज शम्सीचो म्हत्वाचो वांटो आशिल्लो. ताणें चार ओव्हरींनी 19 धांवड्यो दिवन 4 विकेटी घेतल्यो. नेपाळा वतीन आसिफ शेखान 42 धांवड्यांची खेळी केली. अनील साहान 27 धांवड्यांचें योगदान दिलें.
ते पयलीं नेपाळान टॉस जिखून पयलीं दक्षीण आफ्रिकेक बॅटींग करपाचें आमंत्रण दिलें. नेपाळाच्या बॉलरांनी जबरदस्त कामगिरी करीत दक्षीण आफ्रिकेचो डाव 20 ओव्हरींनी 115 धांवड्यांचेर आडायलो.
मोखीचो फाटलाव करपी दक्षीण आफ्रिकेक रिझा हॅण्ड्रिक्सान बरी सुरवात करून दिली. ताणें काडिल्ल्या 43 धांवड्यांच्या नेटार आफ्रिकेन पयल्या 10 ओव्हरींनी बरी बॅटींग केली. 11.2 ओव्हरींनी 2 विकेटी व्हगडावन 68 धांवड्यो केल्यो. पूण, उपरांत नेपाळाच्या बॉलरांनी जबरदस्त पुनरागमन केलें. तांणी आफ्रिकेच्या बॅट्समनांक बांदून दवरले. दिपेंद्र सिंहान 3, जाल्यार कुशल भुरटेलान चार ओव्हरींनी 4 विकेटी घेतल्यो. आफ्रिकेच्या ट्रिस्टन स्टब्सान 18 बॉलांनी नाबाद 27 धांवड्यो केल्यो. आफ्रिकेन 20 ओव्हरींनी 7 विकेटी व्हगडावन 115 धांवड्यां मेरेन मजल मारली.
मोखीचो फाटलाव करपी नेपाळान प्ले ऑफांत बरी सुरवात केली. आठवे ओव्हरींत तबरेज शम्सीन कुशाल भुरटेल आनी रोहीत पौडेल हाका बाद करून नेपाळाक दोन धपके दिले.
ते उपरांत ओपनर आसिफ शेख आनी अनील साह हाणें नेपाळाचो डाव सांबाळ्ळो. ह्या दोगांयनी तिसरे विकेटी खातीर 50 धांवड्यांची भागिदारी केली. पूण, मार्करमान अनील साहाक 27 धांवड्यांचेर बाद करून ही जोडी फोडली. अनील बाद जालो त्या वेळार नेपाळान 14 ओव्हरींनी 85 धांवड्यो केल्ल्यो. नेपाळाक जैता खातीर 30 बॉलांनी 36 धांवड्यांची गरज आशिल्ली.
मॅच नेपाळाच्या हातांत आसा अशें दिसतालें. आनीक धपको बसपी निकाल पळोवपाक मेळुये अशें दिसता आसतना तबरेज शम्सी आफ्रिकेचे मजतीक धांवन आयलो.
ताणें परतून एकदा एकेच ओव्हरींत दोन विकेटी घेवन नेपाळाक बॅकफुटाचेर धुकल्लो. ताणें 18वे ओव्हरींत दिपेंद्रसिंह एेरीक आनी 49 बॉलांनी 42 धांवड्यो करपी आसिफ शेखाक बाद केलो. फाटोफाट नॉर्खियान कुशल मालाक (1) बाद करून नेपाळाची अवस्था 2 बाद 85 धांवड्यां वयल्यान 6 बाद 100 अशी केली.
नेपाळाक निमाणे ओव्हरींत जैता खातीर 8 धांवड्यांची गरज आशिल्ली. बार्टमन अखेरची ओव्हर घालपाक आयलो. पयले दोन बॉल फुकट घालयले. ते उपरांत तिसऱ्या बॉलाचेर चवको मारून मॅच 3 बॉलांनी 4 धांवड्यो अशी हाडली. झा हाणें चवथ्या बॉलाचेर दोन धांवड्यो घेवन मॅच दोन बॉलांनी दोन धांवड्यो अशी हाडली. पांचव्या बॉलाचेर गुलशनाक एकूय धांवडी करपाक जमली ना. अखेरच्या बॉलाचेर नेपाळाक जैता खातीर 2 मॅचींची गरज आशिल्ली. जाल्यार टाय करपाक एके धांवडेची गरज आशिल्ली. पूण, गुलशन चोरटी धांव घेवपाच्या यत्नांत धांवबाद जालो. ताका क्लासेनान धांवबाद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
