भांगरभूंय | प्रतिनिधी
काठमांडू, खबरां संस्था ः नेपाळान शंबर रुपयांच्यो नव्यो नोटी छापपाचो कंत्राट चीनी कंपनीक दिला. पीटीआयच्या म्हणण्या प्रमाण, ह्या नोटे वयल्या नकाशांत भारताचे लिपुलेख, लिंपियाधुरा आनी कालापानी ह्या तीन वाठारांचो भाग आसा. भारत आनी नेपाळ मदीं ह्या वाठारा विशीं सुमार 35 वर्सां सावन वाद आसा.
ह्या अहवाला प्रमाण, चीनाच्या ‘बँक नोट प्रिंटिंग अँड मिंटिंग कॉर्पोरेशन’ कंपनीक नोटी छापपाचो कंत्राट दिला. चीनी कंपनी नेपाळी चलनाच्या नोटींच्यो 30 कोटी प्रती छापतली. हे खातीर सुमार 75 कोटी भारतीय रुपया जाय पडटले. म्हणल्यार 100 रुपयांची 1 नेपाळी नोट छापपाक सुमार 2.50 भारतीय रुपया जाय पडटले.
नेपाळांत नेपाळ राष्ट्र बँकेक नोटींचे डिझायन बदलपाचो अधिकार आसा. पूण ते खातीर तांकां सरकारी मान्यताय घेवची पडटा. नेपाळाच्या मंत्रीमंडळान अंदूं मे म्हयन्यांत ह्या नोटींच्या डिझायनांत बदल करपाक मान्यताय दिल्ली.
नेपाळान 18 जून 2020 दिसा देशाचो नवो राजकी नकासो जाहीर केलो. तातूंत लिपुलेख, लिम्पियाधुरा आनी कालापानी हो वाठार नेपाळाचो दाखयल्लो. ते खातीर नेपाळाच्या संविधानांतय बदल जालो. त्या वेळार भारत सरकारान नेपाळाच्या ह्या पावलाक एकतर्फी आसा अशें म्हणत विरोध केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
