भांगरभूंय | प्रतिनिधी
चीनांत चालू आशिल्ले आशियायी खेळांत काल नेपाळाच्या क्रिकेट पंगडांन विक्रमांचो पावस घालो. मंगोलिया आडचे मॅचींत ताणें पांच विक्रमांची नोंद केली.
मंगोलिया पंगडाक 273 धांवड्यांनी हारोवन आंतरराष्ट्रीय टी-20 क्रिकेटींत धांवड्यांच्या फरकान व्हड जैत जोडलें. पयलीं बॅटींग करतना नेपाळान 20 ओव्हरींनी 3 विकेटी वगडावन 314 धांवड्यो केल्यो. मोखीचो फाटलाव करपी मंगोलियाक 13.1 ओव्हरींनी फकत 41 धांवड्यो करप शक्य जाल्यो. हाचे पयलीं हो विक्रम झेक प्रजासत्ताकाच्या नांवार आशिल्लो. झेक प्रजासत्ताकान 2019त तुर्की आड 257 धांवड्यांच्या फरकान जैत जोडिल्लें.
दीपेंद्र सिंगान मोडलो युवराज सिंगाचो विक्रम
नेपाळाच्या दीपेंद्र सिंगान आंतरराष्ट्रीय टी-20 क्रिकेटींतल्या जलद अर्द शेंकड्याची नोंद केली. ताणें फकत 9 बॉलांनी अर्द शेंकडो पुर्ण केलो. अशे तरेन ताणें भारताचो आदलो दावखुरो बॅट्समन युवराज सिंगाचो विक्रम मोडलो. दीपेंद्रान आपल्या डावांत वट्ट 10 बॉलांनी आठ सक्यांचे मजतीन 52 धांवड्यो केल्यो. युवराज सिंगान 2007तले संवसारीक टी-20 सर्तींत 12 बॉलांनी अर्द शेंकडो पुर्ण केल्लो.
कुशल मल्लाचो जलद शेंकडो
तिसरे सुवातेर बॅटिंगेक आयिल्ल्या कुशल मल्लान फकत 34 बॉलांनी शेंकडो पुर्ण केलो. आंतरराष्ट्रीय टी-20तलो हो जलद शेंकडो थारलो. हाचे पयलीं हो विक्रम जोड रितीन डॅव्हिड मिलर आनी रोहित शर्मा हांच्या नांवाचेर आशिल्लो. दोगांयनी 35 बॉलांनी शेंकडो पुर्ण केल्लो. मल्लान वट्ट 50 बॉलांक तोंड दितना आठ चवके आनी 12 सक्यांचे मजतीन 137 धांवड्यांची खेळी केली.
नेपाळाचो 314 धांवड्यांचो दोंगर
नेपाळान आंतरराष्ट्रीय टी-20 क्रिकेटींत सगल्यांत व्हड धांवसंख्या उबारपाचो लेगीत संवसारीक विक्रम आपल्या नांवार केलो. नेपाळान 20 ओव्हरींनी फकत 3 विकेटी वगडावन 314 धांवड्यांचो दोंगर उबारलो. ताणें अफगाणिस्तानाचो विक्रम मोडलो. अफगाणिस्तानान 2019त आयर्लेण्डा आड खेळटना 20 ओव्हरींनी 3 विकेटी वगडावन 278 धांवड्यो केल्ल्यो.
एका डावांत सगल्यांत चड सके
नेपाळान आपल्या डावांत 26 सके मारले. आंतरराष्ट्रीय टी-20 क्रिकेटींतलो नवो विक्रम आसा. ताणें अफगाणिस्तानाक फाटीं घालो. 2019त आयर्लेण्डा आड खेळटना अफगाणिस्तानान 22 सके मारिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
