भांगरभूंय | प्रतिनिधी
काठमांडू, खबरां संस्था ः नेपाळांत काल रातीं साडेइकरां वरांचेर 6.4 रिश्टर स्केल तांकीचो भुंयकांप जालो. ताचें केंद्र नेपाळांतल्या काठमांडू सावन वायव्येक ३३१ किमी अंतराचेर १० किमी खोल जमनीत आशिल्ले. भुंयकांपात सुमार १३० परस चड जाणांक मरण आयिल्ल्याची म्हायती मेळ्ळ्या. सांजमेरेन हो आंकडो वाडपाची भिरांत आसा. नेपाळांतल्या दोन जिल्ह्यांनी ह्या भुंयकांपाचो चड परिणाम जाला.
रुकुम 36 आनी जाजरकोटांत 92 जाणांक मरण आयलें.
काठमांडू पोस्टच्या म्हणण्या प्रमाण, आतां मेरेन 140 लोक जखमी जाल्ल्याची म्हायती मेळ्ळ्या. ह्या भुंयकांपाचो परिणाम भारतांतूय दिसलो. दिल्ली, नोएडा, गाझियाबाद, उत्तर प्रदेश, मध्य प्रदेश, राजस्थान, हरियाणा, पंजाब आनी बिहाराची राजधानी पाटना हांगा धक्के जाणवले.
मजगतीं, नेपाळाचे प्रधानमंत्री पुष्पकमल दहल प्रचंड हांणी तिनूय सुरक्षा यंत्रणांक बेगोबेग मजत कारवाय सुरु करपाची सुचोवणी दिल्या. ताच्या कार्यालयान सोशल मिडिया प्लॅटफॉर्माचेर आपलें दुख्ख उक्तायलां.
फाटल्या म्हयन्यांत 3 ऑक्टोबराक नेपाळांत 6.2 रिक्टर स्केलचो भुंयकांप जाणवल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
