भांगरभूंय | प्रतिनिधी
इमारती, घरां उध्वस्त, मरप्यांचो आंकडो वाडपाची शक्यताय
काठमांडूः नेपाळांत शुक्रारा रातीं उसरां खर भूंयकांप जालो. हातूंत आतां मेरेन 150 जाणांक मरण आयलें. हो आंकडो वाडपाची शक्यताय आसा. नेपाळांत चार खेपे 64 रिस्टर स्केलचो भूंयकांप जालो. हातूंत इमारती आनी घरा हांचो विध्वंस जालो. 48 मिण्टांत चार खेपे नेटाच्या भूंयकांपान नेपाळाक परतून एकदा विनाशाच्या मार्गार व्हेला.
भूंयकांपाक लागून रस्त्यांचेर वेरो पडल्यात. जायतीं घरां जमीनदोस्त जाली. भूंयकांप जालो तेन्ना भोवतेक लोक न्हिंदेत आशिल्ले. ताका लागून मोट्या प्रमाणांत जिवीत आनी वित्तहानी जाली. 2015 त नेपाळांत जाल्लो भूंयकांप आतां परतून एकदा लोकांक याद जालो.
शुक्रारा रातीं नेपाळांत चार भूंयकांप जाले. भूंयकांपाक लागून जाल्ले नुकसाणीचो नियाळ घेवपाक नेपाळाचे प्रधानमंत्री पुष्प कमल दहल वैजकी पंगडा सयत जजरकोट वाठारांत आसात. प्रधानमंत्र्यांचे प्रेस सल्लागार गोविंद आचार्य हांणी सांगलें, वखदां आनी हॅलिकॉप्टरा सयत भलायकी पंगड तयार केल्यात. पूण बाबत हवामानाक लागून त्या वाठारांत पावपाक मात्सो कळाव जालो. नेपाळांतल्या ह्या भूंयकांपाचो केंद्रबिंदू जजरकोटचे रमीडांडा आशिल्लें. ताका लागून ह्या वाठारांत सगल्यांत चड लुकसाणी जाल्या.
2015 त 8 हजार लोकांक आयिल्लें मरण
हाचे आदीं 2015 त नेपाळांत भिरांकूळ भूंयकांप जाल्लो आनी 8 हजारा वयर चड लोकांक मरण आयिल्लें. त्या वेळार नेपाळांत 7.8 आनी 8.1 रिश्टर स्केलीचो भूंयकांप जाल्लो. नेपाळांत 25 एप्रील 2015 दिसा सकाळीं 11.56 वरांचेर भूंयकांप जाल्लो. ह्या भूंयकांपाचो केंद्रबिंदू लामजुंग ह्या नेपाळा पसून 38 किमि. अंतराचेर अाशिल्लो. जायतीं प्राचीन इतिहासीक मंदिरां आनी इमारती ह्या भूंयकांपांत उध्वस्त जाल्यांत. 1934 उपरांत पयलेच खेपे नेपाळांत इतल्या खरसाणेचो भूंयकांप जाल्लो. जातूंत 8 हजारा वयर लोकांक मरण आयिल्लें.
दिल्ली- एनसीआर, हरियाणातूय भूंयकांपाचे धपके
दिल्ली- एनसीआर, यूपी, बिहार, उत्तराखंड आनी हरियाणा सयत देशांतल्या जायत्या वाठारांत भूंयकांपाचे धपके जाणवले. अचकींत जाल्ल्या भूंयकांपाक लागून लोक घरा भायर पडले. हायरायज सोसायटीच्या विधानसभा वाठारांतूय लोक जमिल्ले. रातीं 11.32 वरांचेर भूंयकांपाचे धपके जाणवले. नेपाळांत भूंयकांपाचो केंद्रबिंदू आशिल्लो. रिश्टर स्केलीचेर ताची खरसाण 6.4 इतली मेजल्या. हो भूंयकांप जमनी पसून 10 किमि. सकयल अंतराचेर आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
