भांगरभूंय | प्रतिनिधी
काठमांडू: नेपाळच्या धादिंग जिल्ह्यांत सोमारा रातीं उसरां एक बस महामार्गावेल्यान न्हंयेंत कोसळ्ळी. नेपाळी माध्यमां प्रमाण, ह्या अपघातांत १८ लोकांक मरण आयलें, जाल्यार २५ जाण जखमी जाल्यात. मरण आयिल्ल्यां मदीं एक दादलो आनी एक बायल परदेशी नागरिकांचो आसपाव आसा. मात, ते खंयच्या देशाचे आशिल्ले आनी तांचीं नांवां आजून मुखार येवंक नात.
पुलीस दळा प्रमाण, आतां मेरेन १७ कुडी भायर काडल्यात. उपरांत आनीक एका प्रवाशाच्या मरणाची पुश्टी जाली. हाका लागून मरण आयिल्ल्यांचो आंकडो १८ चेर पावलो. जखमी जाल्ल्या लोकांक हॉस्पिटलांनी दाखल केल्यात.
बस पोखराच्या काठमांडू वताली. कांय कारणांक लागून बस चालकाचें बसी वेल्यान नियंत्रण सुटलें आनी ती त्रिशूली न्हंयेंत कोसळ्ळी. हो अपघात रातचो १:३० वरांचेर जालो.
मरण आयिल्ल्यां मदीं १२ दादले आनी ६ बायलांचो आसपाव आसा. अपघाता वेळार बसींत वट्ट ४४ प्रवासी आशिल्ल्याची म्हायती पुलिसांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
