भांगरभूंय | प्रतिनिधी
नेत्रा सावयकार हिणें राज्य पांवड्या वयली बायलांची बुद्दीबळ सर्त जिखली. तिणे स फेरयेंतल्यान सगल्यांत चड साडेपांच गूण मेळयले.
श्रीपाद आनी अनुसुया कामत तारकार स्मृती राज्य पांवड्या वयली बायलांच्या गटांतली सर्त तिसवाडी तालुको बुद्दीबळ सर्तीच्या सहकार्यान मळा-पणजीच्या महालक्ष्मी वाचन मंदिरांत घेतिल्ली.
नेत्रान पांच जैतां आनी एक बरोबरी सादली. तिणें अस्मिता रे आड जोडिल्लें जैत निर्णायक थारलें. अस्मिता पांच गुणां सयत उप वस्ताद थारली. सयुरी नायकान तिसरी सुवात मेळयली. तिचे लेगीत पांच गूण जाल्ले. पयल्यो चार सुवातो मेळोवपी खेळगडयो 8 ते 18 नोव्हेंबर ह्या कालावधीत जावपी राष्ट्रीय बायलांचे बुद्दीबळ सर्तींत गोंयचें प्रतिनिधित्व करतलीं.
संस्कृती नारोजी, स्वेरा ब्रागांझा, राचेल परेरा, आर्या दाभोळकार,श्रीवल्ली गांधी, स्नेहल नायक आनी आर्वी नायक हांणी वळेरेन चवथी ती धावी सुवात मेळयली.
पिराय गटांत (7,9,11 आनी 13 वर्सां पिराये सकयलो गट) अवनी सावयकार, दिया सावळ, वैष्णवी परब, वालंका फर्नांडीस, निलिशा फाचो, गुंजल चोपडेंकार, अलाना आंद्राद हांकां इनामां फावो जालीं.
श्रीपाद आनी अनुसुया कामत तारकार हांची धूव रमा रामाणी, महालक्ष्मी वाचन मंदिराचे सचीव नारायण पेडणेंकार, गोंय बुद्दीबळ अस्थायी समितीचे निमंत्रक सचीन आरोलकार, मिलिंद रामाणी, अरविंद म्हामल, दत्ताराम पिंगे, प्रकाश सावंत, आतिश आंगले, नरेश पेडणेंकार इनामां भेटवण सुवाळ्याक उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
