भांगरभूंय | प्रतिनिधी
आनी एक दीस अचानक त्या जाग्यार पावतकच आपल्या सपनातलो होच तो जागो अशें म्हणून तांणी खात्री करून घेतली. कौल प्रसाद घेवन 23 जानेवारी 1967 दिसा मुर्तीची स्थापना केली.
सांगे तालुक्यांतल्या नेत्रावळी गांवाक सैमाचें वरदान मेळ्ळां. दोळे दिपकावपी थळांचें देणें, शांत, पवित्र असो हो गांव. हांगां नरसोबावाडीची प्रतिकृती मानतात अशें पोरणें देवस्थान आसा. श्री दत्तक्षेत्र नांवाचें. दत्तगुंफा म्हणूनय तें लोकप्रीय आसा. सांगेच्या पर्यटनाच्या नदरेन हें म्हत्वाचें थळ आसून दोंगरा वेल्यान व्हांवत येवपी थंड शितळ न्हंय. सरभोंवतणी पाचवीचार कुळागारां, सुपारीच्या उंच उंच माडयां वांगडा कुळागरांतल्यान खळखळपी उदकाचो आवाज, शेंवण्यांचो चिवचिवाट आयकून मन प्रसन्न जाता. ही सैमिक गिरेस्तकाय मनांत सांठयत मुखार वतना दत्तगुंफा देऊळ दिश्टी पडटा.
दत्तगुंफा हें थळ प्रभुदेसाय कुटुंबाच्या पूर्वजांक दृष्टांत जावन प्राप्त जाल्लें. तें फातराच्या गुंफेच्या स्वरूपांत आसा. मदींच 200 वर्सा आदींचो औदुंबराचो रुख. सर्गेस्त सदाशिव (नाना) श्रीपती प्रभुदेसाय हांणी देवळाचे उदरगती खातीर यत्न केले. तांणी श्री दत्त देवळाक भायल्यान थोडो आकार दिलो आनी तांचे इश्ट श्रीपाद प्रभुदेसाय हांच्या सहकार्यान देवळांत सुदारणा घडोवन हाडल्यो. तेन्ना ल्हानशे देऊळ उबें जालें. पूण तें उबें जावप हो श्री दत्तमहाराजाचो चमत्कारच म्हणूंक जाय. देवळाचें काम चलतना शिमिट, चिरे सोंपले अशे दिसताना चमत्कार जातालो आनी कोणतरी आपल्याक आयिल्ल्या अनुभवान सदगदीत जावन दान करतालो. दत्त पादुकांची पुजा करतना वेल्यान दुधाची धार गळप, शिमिटाच्या ओल्या मिश्रणाचेर उजवे पादुकेचो आकार चमत्काररित्या तयार जावप, उजवाती लायनासतना दरवळपी म्होंवाळ वास हेवूय खीण थंय पळोवपाक मेळटाले, अशें गुरुदास प्रभुदेसाय सांगतात. कोणतरी दत्तभक्त श्री गुरुदत्ताची मुर्त स्थापन करतले असो विचार करून देवळांत एक शेक दवरलो आनी तेदेवेळार सांगेचे वेपारी सदाशिव नागेश कर्पे हांकां सपनाक एके गुहेचो आनी पादुकाचो दृष्टांत जालो. आपूण श्री दत्तमूर्ती दिता अशें दिसलें. आनी एक दीस अचानक त्या जाग्यार पावतकच आपल्या सपनातलो होच तो जागो अशें म्हणून तांणी खात्री करून घेतली. कौल प्रसाद घेवन 23 जानेवारी 1967 दिसा मुर्तीची स्थापना केली. त्या वेळा सावन कर्पे कुटूंबा कडल्यान मुर्ती स्थापनेचो वर्धापन दीस मनयतात. गुरुदुवादस, दत्तजयंती, गुरुपौर्णिमा हे आनी हेर उत्सव नेत्रावळीच्या प्रभुदेसाय कुटूंबा कडल्यान साजरे जातात.
देवळांतल्यो कांय वस्तू कोणाक तरी दृष्टांत जावनच मेळिल्ल्यो आसात. गर्भकुडींत श्री गणपतीची मुर्ती तशेंच शेजरा ज्ञानेश्वर महाराजांची मुर्ती आनी तुळशी वृंदावन आसून सदाशिव प्रभुदेसाय हांणीच फुडाकार घेवन तांची स्थापना केल्ली. नरसोबावाडी भशेनच हें देऊळ बांदिल्लें आसा. तेच भशेन चारूय वटेन उगतो मंडप आसा. ह्या सैमिक वातावरणाचो आनंद घेवपाक आनी देवदर्शन घेवपाक गोयचें तशेच विदेशी पर्यटक हांगा येतात.
संदीप पुंडलीक मापारी
96731 71992
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
