भांगरभूंय | प्रतिनिधी
‘तुम मुझे खून दो मैं तुम्हें आझादी दुंगा’ ह्या उतराक लागून ते सदांच आमच्या मनांत अजूनय आसात. आयज नेताजी सुभाष चंद्र बाेस हांची जयंती ते निमतान…
आमच्या भारत भुंयेंत कितलेशेच व्हड महापुरुस, क्रांतिकारक जावन गेले. प्रत्येकान आपले जीण मायभुंये खातीर आनी स्वांतंत्र्या खातीर दिली. लोकांच्या मनांत जागृताय निर्माण करपाचो तांणी येत्न केलो. आपल्या बऱ्या कार्यान आनी कर्तृत्वान लोकां मदीं फामाद जाले. कोणाक लोक लोकमान्य अशे म्हणपाक लागले तर कोणाक महात्मा म्हणटाले.
नेताजी ह्या नांवान जगभर नामनेक पाविल्ले क्रांतिकारक आनी जहाल विचारांचे फुडारी सुभाष चंद्र बोस हांचो जल्म 23 जानेवारी 1897 दिसा कटक हांगा जालो. तांच्या बापायचें नांव जानकीनाथ आनी आवयचें नांव प्रभावतीदेवी आशिल्लें.
सुभाष बाबू सशस्त्रक्रांती कट्टर समर्थक आसले. ते आपल्या आवयाचे खूब आवडीचो चलो आशिल्ले. 1913 ह्या वर्सा ते मॅट्रीक परिक्षेंत पयले आयले. सुभाष चंद्र एक हुशार विद्यार्थी आशिल्ले. तांची याद तिखी आशिल्ली. ताका लागून संस्कृत ह्या विशयांत ‘तांका शंबरांतले शंबर गूण मेळिल्ले. तांचे मुळावें शिकप फिरंगी शाळेंत जाले. तांची शाळा खूब कडक शिस्तीची आशिल्ली. सगल्या भुरग्यांनी वेळार शाळेंत येवपाक जाय असो थंयचो कायदो आशिल्लो. शिक्षणा बराबर भुरग्यांच्या मनाचेर बरे संस्कार करप ह्या गजाली कडेन चड लक्ष दिताले. शाळेंतल्या मुख्याध्यापकाक सगली भुरगीं भितालीं. बाकीचे शिक्षक इंग्रज आसले आनी थोड्यो शिक्षिका हिंदी भुरग्यां कडेन वेगळेच पद्दतीन वागताल्यो. अश्या वातावरणांत सुभाष बाबून मुळावें शिक्षण घेतलें. कॉलेजीचें शिकप सोंपतकच फुडें शिकपा खातीर ते इंग्लडाक गेले. थंय ते आएसीएस जाले. तांकां थंय सरकारी नोकरी करपाची संद मेळिल्ली. पूण, सुभाष चंद्र हे वेगळ्याच विचारसरणीचे आशिल्ले. भारताचेर सत्ता चलोवपी आनी लोकांचो व्हड प्रमाणांत छळ करपी इंग्रज सरकाराच्या हाता खाला नोकरी करपाक तांणी न्हयकार दिलो.
इंग्लड देशांत दोन वर्सां आसतना आपले वागणुकेक लागून ते बाकीच्या विद्यार्थ्यांचे मोगी जाले. जेन्ना जेन्ना तांकां फाविल्लो वेळ मेळटालो तेन्ना तांणी वेगळ्या वेगळया विशयांचीं पुस्तकां वाचपाक सुरवात केली आनी जगाचो इतिहास आनी संस्कृताय समजून घेवपाचो येत्न केलो. पूण इंग्रज विद्यार्थ्यां बराबर रावन लेगीत तांणी आपले चारित्र्य शुद्ध दवरलें.
ते भारतांत परतले आनी सुटके झुजांत वांटेकार जाले. चित्तरंतन दासांच्या सांगातान ते चळवळ चलयताले. जालियनवाला बाग हांगा 1919 ह्या वर्सा जनरल डायर हांणी मनशांचेर केल्ल्या सांवारांचो तांच्या मनाक खूब धक्को बसलो आनी ते भारतीय राष्ट्रीय काँग्रेसींत भितर सरले. मायभुंयेचे मुक्तताये खातीर आपली जीण दिवपाचें तांणी थरायलें. भारताक पुराय स्वांतत्र्य मेळपाक जाय, आपल्या देशाचो फुडार आमीच घोडाेवपाक जाय, स्वंतत्र भारत हेंच म्हजें सपन आसा आनी तें सपन खरें करपाक कितलेय त्रास, कश्ट घेवपाची म्हजी तयारी आसा अशें तांणी मनांत थरायलें. हे खातीर आपलो देश सोडून तें विदेशांत गेले. जपान, जर्मनी सारक्या देशांची मजत घेवन सिंगापूरांत ‘आझाद हिंद सेने’ची फौज तयार केली आनी ब्रिटीश सरकारा आड झुजाची घोशणा दिली. आझाद हिंद रेडियोच्या माध्यमांतल्यान जयहिंद, चलो दिल्ली ची घोशणा दिली.
1943 वर्सा डिसेंबरांत आझाद हिंद सेनेन बर्मा, भारतीय शीम हुपली आनी ती कोहिमाक आयली आनी थंय सावन इंफाळाक. पूण दुर्दैवान त्याच वेळार अमेरिकेन जपान देशाच्या हिरोशीमा आनी नागासाकी ह्या दोन शारांचेर अणूबॉम्ब घाले आनी झूज सोंपयलें. सुभाष चंद्र हांकां निरुपायान फौज फाटीं घेवची पडली आनी झूज थांबोवचें पडलें. ह्यो सगल्यो घडणुको घडत आसतना एका विमान अपघातांत तांकां 18 ऑगश्टाक मरण आयलें. नेताजी गेले, आपल्या कर्तुबान अज्रंवर जाले. पूण ‘तुम मुझे खून दो मैं तुम्हें आझादी दुंगा’ ह्या उतराक लागून ते सदांच आमच्या मनांत अजूनय आसात.
प्रा. किशोर वासुदेव वझे
नागेशी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
