भांगरभूंय | प्रतिनिधी
पुलिसां कडल्यान गुन्यांव नोंद
लंडन, खबरां संस्था ः संवसारभर लिंगीक अत्याचाराचीं प्रकरणां घडत आसात. वास्तवीक जगांत ह्यो घडणुको वाडत आसतना आतां व्हर्च्युअल जगांत लेगीत बायलां सुरक्षीत नात, हें उजवाडाक आयलां. ‘मेटाव्हर्स’ ह्या व्हर्च्युअल विश्वांत व्हर्च्युअल रियलिटी व्हिडियो गेम खेळपी चलयेचेर पांच जाणांनी बलात्कार केलो. ह्या लिंगीक अत्याचाराक लागून पिडित चलयेक कांयच शारिरीक लुकसाण जावंक नासलें तरी तिचें मानसीक आनी भावनीक लुकसाण जाला. ही घडणूक ब्रिटनांत घडल्या आनी मेटावर्सांतल्या पयल्या बलात्कार प्रकरणांत पुलिसांनी गुन्यांव नोंद केला.
मेटावर्स हो डिजिटल संवसार. हांतूत आमी आमचे डिजिटल अवतार तयार करून संवसारभरांतल्या लोकां कडेन संवाद सादपाक शकतात. तांचे वांगडा भोंवूंक शकतात, खरेदी करूंक शकतात. खऱ्या जगांत शक्य आशिल्ल्यो सगळ्यो गजाली मेटावर्साच्या डिजिटल जगांतय शक्य आसा. ह्याच मेटावर्सांत 16 वर्सां पिरायेचे नेण्टे चलयेचेर सामुहीक बलात्कार जालो. फरक फकत इतलोच की बलात्कार प्रत्यक्षांत ते चलयेचेर न्हय तर तिच्या डिजिटल अवताराचेर जालो. पिडित चली व्हर्च्युअल व्हिडियो गेम खेळटालें. तेन्ना पांच दादल्यांनी तिच्या डिजिटल अवताराचेर बलात्कार केलो. तिचेर बलात्कार जालो तेन्ना तिचें डिजिटल पात्र हेर वापरप्यां वांगडा ऑनलायन रूमांत आशिल्लें. मजगतीं, हे खेपे तें खंयचो खेळ खेळटाली तें स्पश्ट जावंक ना.
मेटावर्सांत गुन्यांवकारांक संद
नॅशनल पुलीस चीफ कौन्सिलचे चाइल्ड प्रोटेक्शन अँड अब्यूज इन्व्हेस्टिगेशन अध्यक्ष इयान क्रिचले हांणी सांगलें, मेटावर्सांत लिंगीक गुन्यांवकारांक गुन्यांव करपाची संद मेळटा. देखून आमी अशा प्रकरणां आड कारवाय करतात. आधुनीक तंत्रगिन्यानाचो सुरक्षीत वापर जाता हाची खात्री करप म्हत्वाचें. फाटल्या कांय वर्सांत गुन्यांवकारांचे प्रकार वाडल्यात. खऱ्या जगांतले गुन्यांव डिजिटल स्वरुपांतय घडपाक लागल्यात म्हणून पुलिसां मुखार आव्हानां वाडल्यात. क्रिचले हांणी म्हणलें, आमचो पोलिसिंग दिश्टीकोन सतत विकसीत जायत रावंक जाय. हाका लागून आमकां गुन्यांवकारांक सोदून पिडेस्तांची राखण करपाक मेळटली.
डिजिटल वळख लिपोवप कठीण
डिजिटल वळख राखप आनी वापरप्यांची सुरक्षीतताय सुनिश्चीत करप संघटणां खातीर चड आव्हानात्मक जावपाक लागलां. व्हर्च्युअल रिअॅलिटी स्पेसचे पोलिसिंग करपा खातीर अत्याधुनीक तंत्रज्ञाना सयत वास्तवीक संवसारातल्या कायद्याची अंमलबजावणी करप गरजेचें आसा, अशें तज्ञ म्हणटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
