भांगरभूंय | प्रतिनिधी
मडगांवः साश्टी वाठारांतल्या स्थलांतरीत कामगार वर्गांतल्या नेण्टे चलयेचेर लैंगीक अत्याचार जालो आनी तिचे भयणीचो विनयभंग केलो. हे संबंदी कागाळ दाखल जाले उपरांत फातोड्डें पुलिसांनी एकल्याक अटक केल्या. पिडित चलये मदलीं एक धा वर्सां पिरायेची आनी दुसरी आठ वर्सां पिरायेची आसा.
पिडित चलयांचे कुटुंब दुबाविताक वळखतालें. आवय-बापूय कामाक वताले देखून दुबाविताक चलयांक शाळेंतल्यान हाडपाक सांगिल्लें. त्या वेळार दुबावितान तीन वेगवेगळ्या सुवातेर दोन ते तीन फावटीं तिचेर लैंगीक अत्याचार केल्ल्याचें पिडित चलयेन सांगलें. चार दिसां आदींय दुबावितान तिचेर लैंगीक अत्याचार केल्लो. ल्हान चलयेर तिच्या घरा येवन तिचो विनयभंग केल्लो. ते वेळार पिडित चलयांची मावशी घडणुकेच्या सुवातेर पावतकच ही घडणूक उजवाडाक आयली. आवय हेर कडेन कामाक गेल्ली आनी पिडीत चलयेन भियेवन ही घडणूक कोणाकूच सांगूंक नाशिल्ली.
हे घडणुके उपरांत बायलांचो एकवोटची अध्यक्ष आवडा व्हिएगश हांणी कामगारांच्या भुरग्यांचे सुरक्षेचो प्रस्न मांडलो. राज्या भायल्यान कामाक येवपी कामगारांच्या भुरग्यांक सुरक्षीत वातावरण दिवपाची गरज आसा. कामगार आयात करपी कंत्राटदारांनी कामगारांच्या भुरग्यांचे सुरक्षे संबंदी उपाय घेवपाची गरज आसा. वास्को पांच वर्सां पिरायेचे चलयेचेर बलात्कार आनी खून जाले उपरांत लेगीत हो प्रस्न उप्राशिल्लो. हाचेर आतां फावो ते उपाय करपाचो वेळ आयला अशें व्हिएगश हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
