भांगरभूंय | प्रतिनिधी
काठमांडू, खबरां संस्था ः नेपाळी धर्मगुरू रामबहादुर बोमजान हाचेर 15 वर्सां पिरायेचे साध्वीचेर बलात्कार केल्ल्याचो गुन्यांव दाखल जाला. ब्रिटीश मिडिया इंडिपेंडंटाच्या मतान, ‘बुद्ध बॉय’ ह्या नांवान लोकप्रीय आशिल्ल्या 33 वर्सां पिरायेच्या रामबहादुर हाका अंदूं जानेवारींत लैंगीक अत्याचार आनी चार जाणांचें अपहरण केल्ल्या प्रकरणांत अटक केल्ली.
सरलाही न्यायालयान ताका लैंगीक अत्याचार प्रकरणांत गुन्यांवकार थारायलो आनी आतां ह्या प्रकरणांत 1 जुलयाक ख्यास्त फर्मायतले. रामबहादुराक उण्यांत उणी 12 वर्सां बंदखणीची ख्यास्त जावंक शकता.
काठमांडू पोस्टान पुलिसांच्या आरोपपत्राचो उल्लेख करून बरयलां की 2016 वर्सा रामबहादुरान 15 वर्सां पिरायेच्या साध्वीक आपल्या कुडींत आपोवन तिचे कडेन जबरदस्तीन लैंगीक संबंद दवरले. तशेंच हे विशीं कोणाक सांगचे न्हय अशी धमकीय ताणें साध्वीक दिली.
धर्मगुरू ताका मारतालो
अंदूं जानेवारींत रामबहादुराक अटक करतना पुलिसांनी ताच्या घरांतल्यान 30 दशलक्ष नेपाळी रुपया (भारतीय चलनांत सुमार 2 कोटी रुपया) जप्त केल्ले. हाचे भायर 16 देशांचें चलनय सांपडलें. रामबहादुराच्या भक्तांच्या मतान ताणें खूब ल्हान पिरायेचेर तपस्या सुरू केली. तो अन्न, उदक, न्हीद नासतना तपस्या करतालो. देखूनच ताका ‘बुद्ध बॉय’ ह्या नांवान वळखूंक लागले. 2018 वर्सा 18 वर्सां पिरायेच्या साध्वीन बोम्जनान आपणाचेर बलात्कार केल्ल्याचो आरोप केल्लो. हाचे उपरांत 2019 वर्सा 4 भक्त बेपत्ता जाले. बेपत्ता जाल्ल्या भक्तांच्या कुटुंबान बोमजाना आड कागाळ दाखल केली. बेपत्ता जाल्ले भक्त निमाणे बोमजानाच्या आश्रमांत दिशिल्ले अशें कुटुंबान सांगलें. 2020 वर्साय लैंगीक छळाचो आरोप जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
