भांगरभूंय | प्रतिनिधी
जैवविवीधताय मंडळाच्या अहवालांतल्यान म्हायती
पणजीः उदरगतीच्या नांवान नेटान जावपी शारिकरणाक लागून जैवविवीधतायेचें व्हड प्रमाणांत लुकसाण जालां. ते भायर साधन सुविधा तयार करपी संस्था आनी खातीं आसात तीं पर्यावरणाचें हीत लक्षांत घेवन एकमतान मुखार वचनात. जो एकलो आपल्याक जाय ती मनमानी करता. जर हें लुकसाण भरून काडटले जाल्यार सद्याचे कायदे आसात तांचेर विधीमंडळ नियाळ गरजेचो अशी सुचोवणी गोंय जैवविवीधताय मंडळाच्या अहवालांत दिल्या.
मंडळान गोंय जैवविवीधताय कृती आराखडो ह्या अहवालांत जैवविवीधताय संरक्षणा खातीर प्रादेशीक आराखडो, ओडीपी नियोजन प्रक्रिया ह्या विशयाचेर आर्किटेक्ट के. डी. साधले हांणी केल्ल्या विश्लेशणांतल्यान ही म्हायती दिल्या.
फाटल्या अर्द शेंकड्या सावन जाल्ल्या नेटाच्या शारिकरणाक लागून भुयेंच्या रुपांत बदल जाला. उदरगतीच्या नांवान जावपी दोंगरांची कापणी, पाणथळ आनी भातशेतांत मातयेचो भराव, सैमीक उदका वाठारा कडेन छेडछाड, रेंवचे दोंगर, लिंगोड आनी कांदळीचें लुकसाण ह्या सारक्या गजालींक लागून जैविवीधतायेचें व्हड प्रमाणांत लुकसान जालां. शारांतली जमीन, उदका वाठार आनी हेर सैमीक मालमेत्तेच्या उत्पादन क्षमतेचो विचार शार रचणुकेचे प्रक्रियेंत जांवक ना. भातशेतां, सुपीक शेतां, सैमीक वनस्पत, मीठागर, कांदळी आनी रेंवेच्या दोंगराचो विनाश केल्ल्या कारणान शाश्वतायेचें व्हड प्रमाणांत लुकसाण जालां.
पर्यायी उर्जा यंत्रणा जशी की सौर्य, बायोगॅस हेर गजालीं खातीर सबसिडी दिवपी खूब उण्यो येवजण्यो आसात. पूण सरकार तशेंच वैज्ञानीक आनी तंत्रिकी फोरमा कडल्यान शाश्वतायेक प्रोत्साहन दिवपा खातीर खूबशे पर्याय आनी यंत्रणा आसात. पीडीए, पालिका, जीसुडा, भौशीक बांदकाम खातें, सिवरेज म्हामंडळ, उदका पुरवण सारकिल्ल्यो विवीधताये खातीर आनी एन्जसी आपल्याक जाय तशेंच आपल्याे येवजण्यो आनी आराखड्यांक अणसरून काम करतात. पूण पर्यावरणीय पैलुंचो विचार न करतां एकठांय येवन काम करिनात.
हे समस्येचें निवारण करपा खातीर जे सद्या शार उदरगत कायदे आनी उपक्रम आसात ते पर्यावरणपुरक आसचे. ओडीपीन लोकसंख्येची घनता आनी झोनींग प्रमाणाचे नेम पाळचे. विवीध एजन्सी आनी खात्याचो समन्वय घडोवन हाडचो. शार उदरग उपक्रम हे पर्यावरण पुरक आसचे. असंघटीत उदरगतीचो प्रसार बंद करपा खातीर नो डेव्हलपमेंट पाचवो वाठार अधोरेखीत करचो, अशी सुचोवणी अहवालांत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
