भांगरभूंय | प्रतिनिधी
पणजी: श्रीनिराकार विद्यालय माश्यां नॅस्ले इंडिया कंपनी वतीन सीएसआर खाला बांदिल्ल्या नव्या शौचालयाचें उक्तावण विद्यालयाची विद्यार्थिनी कृतीका पागी हिचे हस्तुकीं जालें. ह्या वेळार नॅस्ले इंडिया कंपनीचे अधिकारी मारियो फेर्नांडीस, सहाय्यक अनुपा गावडे, श्रीनिराकार संस्थानाचे अध्यक्ष नारायण प्रभुगांवकार, निराकार शिक्षण संस्थेचे अध्यक्ष प्रशांत नायक, सचीव नंदा सतरकार, पालक शिक्षक संघाच्यो अध्यक्षा दिपाली प्रभू अग्रासनी, मुख्याध्यापक उर्वी फळदेसाय आनी पालक आनी शिक्षक हाजीर आशिल्ले.
उक्तावण सुवाळ्या उपरांत जाल्ले कार्यावळींत मारियो फेर्नांडीस हांणी काणकोण सारक्या गांवगिऱ्या म्हालांतल्या माशें गांवांत शौचालयाची सुविधा विद्यर्थ्यां खातीर उपलब्ध करून दितना नॅस्ले इंडिया कंपनीक खोस भोगता. नितळ भारताची घोशणा सरकारा कडल्यान जावचे पयलींच कंपनी वतीन शिक्षणीक संस्थां खातीर शौचालयाची येवजण राबयतात, आनी आतां सरकाराच्या नितळ भारत उपक्रमांत नॅस्ले कंपनी चडांत चड वांटो घेत आशिल्ल्याचें तांणी सांगलें.
निराकार शिक्षण संस्थेच्या ह्या उपक्रमांत श्रीनिराकार संस्थानाचोय हातभार लागिल्ले खातीर नारायण प्रभुगांवकार हांणी समाधान उक्तायलें.
निराकार शिक्षण संस्थेचे अध्यक्ष प्रशांत नायक हांणी शाळेची खूबशा वर्सां सावन प्रलंबीत आशिल्ली शौचालयाची गरज पुराय केल्ले खातीर नॅस्ले इंडिया कंपनीचे उपकार मानले.
मुख्याध्यापिका उर्वी फळदेसाय आनी पालक शिक्षक संघाची अध्यक्षा दिपाली प्रभू अग्रासनी हांणीय आपल्या उलोवपांत नॅस्ले इंडियाचे उपकार मानले.
कार्यावळीचें सुत्रसंचालन शिक्षिका उज्वला लोलयेंकार आनी उपकार प्रदर्शन राहूल गांवकार हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
