भांगरभूंय | प्रतिनिधी
खबरां संस्था
जाकार्ताः ज्युनियर गटांतल्या संवसारीक वस्ताद नॅन्सीन आशियाई ऑलिम्पीक पात्रताय नेमबाजी सर्तींत बुधवार सिनियर गटांत 10 मीटर ऍर रायफल प्रकारांत भांगरा पदक मेळयलें. त्याच वेळार ऑलिम्पिकांत खेळपाचो अणभव आशिल्लें एलाव्हेनील रुप्या पदकाचें मानकरी थातलें.
एलाव्हेनील 633.8 अश्या सगल्यांत चड गुणांनी निमणे फेरये खातीर पात्र थारल्लें. नॅन्सीन 632.4 जाल्यार मेहुलीन 631.0 गुणांनी निमणे फेरयेंत प्रवेश केल्लो. निमणे फेरयेंत मात नन्सीची अचूकता चड आशिल्ली. निमणे संद मेरेन बोरोबोरींत आशिल्ल्या एलाव्हेनिलाक ते संदीचो 9.7 गुणाचो वेध घेवपाक मेळ्ळो. नॅन्सीन अचूक लक्ष्यभेद करतना भांगरा पदकाचेर आपलें नांव कोरातीत केलें.
ऑलिम्पीक खातीर हाचे पयलींच पात्र थारल्ल्या रुद्राक्ष पाटीलाक कांस्या पदकाचेर समाधान मानचें पडलें. 228.7 गुणांनी ताणे हें पद मेळयलें. चीनाच्या मा सिहानान (251.4) भांगराचे जाल्यार कोरियाच्या दाएहन चौएन रुप्या पदक मेळयलें. भारताच्या अर्जुन बबुतान निमणे फेरयेंत प्रवेश केल्लो मात ताका 6वे सुवातेर रावचें पडलें. पात्रता फेरयेंत रुद्राक्ष तिसरे जाल्यार बबुता चवथे सुवातेर आशिल्लो. ताका लागून तांका निमणी फेरयेंत वचपाक मेळ्ळें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
