भांगरभूंय | प्रतिनिधी
संवसारीक वन डे क्रिकेट सर्तींत हांगाच्या हिमाचल प्रदेश क्रिकेट असोसिएशनाच्या मैदानाचेर जाल्ले 15वे मॅचींत नॅदरलॅण्ड पंगडान बळिश्ट दक्षीण आफ्रिका पंगडाक 38 धांवड्यांनी हारोवन अंदूंचे सर्तींतलो सगल्यांत धपको दिवपी निकाल दिलो.
हाचे पयलीं म्हणल्यार पोरूं जाल्ले संवसारीक टी-20 सर्तींत दक्षीण आफ्रिका पंगडाक नॅदरलॅण्डा कडल्यान 13 धांवड्यांनी हार घेवची पडिल्ली. ते हारीक लागून आफ्रिकेचें सर्तींतलें आव्हान सोंपिल्लें.
टॉस हारल्या उपरांत पयलीं बॅटींग करपी नॅदरलॅण्डान एका वेळार 82 धांवड्यांचेर 5 विकेटी वगडायिल्ल्यो. पूण, थंयच्यान मुखेली स्कॉट एडवर्डान नाबाद 78 धांवड्यांची खेळी करून पंगडाक 8 बाद 245 मेरेन पावयलो.
मोखीचो फाटलाव करपाक मैदानांत देंवपी दक्षीण आफ्रिकेक 42.5 ओव्हरींनी सगल्यो विकेटी वगडावन 207 धांवड्यो केल्यो.
नॅदरलॅण्डा वतीन बीक, मिकेरेन, मेर्वे आनी लिड्स हांणी दरेकी 2 विकेटी घेतल्यो. दक्षीण आफ्रिके वतीन डॅव्हिड मिलरान सगल्यांत चड 43 धांवड्यो केल्यो.
पावसाक लागून मॅच उसरा सुरू जाल्ल्यान मॅच 43 ओव्हरींची केली. टॉस जिखून दक्षीण आफ्रिकेन दुबळ्या नॅदरलॅण्डाक पयलीं बॅटींग करपाचें आमंत्रण दिलें. ताचो हो निर्णय योग्य थारिल्लो. ताणें 82 धांवड्यांचेर पांच बॅट्समनांक तंबूंत धाडिल्ले. पूण, ते उपरांत एडवर्डान 69 बॉलांनी नाबाद 78 धांवड्यांची खेळी केली. ताणें 10 चवके आनी एक सको मारलो.
ताणें सकयले सुवाते वयल्या बॅट्समनां वांगडा ल्हानल्हान पूण म्हत्वाच्यो भागिदारी केल्यो. बीक (10), मेर्वे (29) आनी आर्यन दत्त (23) हाणें बरी साथ दिली.
नॅदरलॅण्डान दक्षीण आफ्रिके मुखार 43 ओव्हरींनी 246 धांवड्यांची मोख दवरली. आफ्रिकेन आक्रमक सुरवात करपाचो यत्न केलो. तो ही मोख सहज मेळयतलो अशें दिशिल्लें. पूण, फकत चार ओव्हरींनी मॅच नॅदरलॅण्डा वटेन घुंवली.
ताचे बावुमा (16), डीकॉक (20), मार्करम (1) आनी डुसेन (4) हे चार दिग्गज बॅट्समन फाटोफाट तंबूंत परतले. ताका लागून आफ्रिकेची स्थिती 4 बाद 44 अशी जाली. अशा वेळार मिलर आनी क्लासेन हाणें डाव सांबाळपाचो यत्न केलो. पूण, ही जोडी बीक हाणें फोडली. ताणें क्लासेनाक 28 धांवड्यांचेर बाद केलो. ते उपरांत येनसेन 9 धांवड्यांची भर घालून परतून गेलो.
जेराल्डान 22 धांवड्यो करून प्रतिकार करपाचो यत्न केलो. पूण, ताचो यत्न लेगीत फुकट गेलो. बिकान आफ्रिकेक 31वे ओव्हरींत व्हड धपको दिलो. ताणें जैताची आस्त कायम दवरपी आक्रमक बॅट्समन मिरलाक बाद केलो. रबाडा 9 धांवड्यो करून बाद जाल्या उपरांत आफ्रिकेची निमाणी जोडी केशव महाराज आनी लुंगी एन्गिडी हाणें आफ्रिकेची गळती थांबयली. पूण, ते मेरेन मॅच आफ्रिकेच्या हातांतल्यान गेल्ली. अखेरेक आफ्रिकेक 200चो आंकडो हुपून दिवपी केशव महाराज 40 धांवड्यांचेर बाद जालो आनी नॅदरलॅण्डाक 38 धांवड्यांनी इतिहासीक जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
