भांगरभूंय | प्रतिनिधी
अंदूंचे संवसारीक वन डे क्रिकेट सर्तींत दोळे दिपकावपी प्रदर्शन करपी नॅदरलॅण्ड पंगडान आनीक एका धपको दिवपी निकालाची नोंद केली. ल्हानशे धांवसंख्येची राखण करतना नॅदरलॅण्डान बांगलादेशाक 87 धांवड्यांनी हारयलो. नॅदरलॅण्डान दिल्ले 230 धांवड्यांचे मोखीचो फाटलाव करपी बांगलादेशाचो डाव 142चेर सोंपलो. अंदूंचे सर्तींतलें ताचें हें दुसरें जैत थारलें.
दक्षीण आफ्रिके आडच्या झणझणीत जैता उपरांत नॅदरलॅण्डाचो पंगड चर्चेंत आयिल्लो.नॅदरलॅण्डान आपले फुडले मॅचींत श्रीलंकेक लेगीत घाम काडिल्लो.
ते पयलीं बांगलादेशाच्या बॉलरांच्या उत्कृश्ट बॉलिंगे मुखार नॅदरलॅण्डाचे बॅट्समन आडखळिल्ले. पूण, निर्धारीत 50 ओव्हरींनी सगल्यो विकेटी वगडावन 229 धांवड्यां मेरेन मजल मारपाक ताका येस आयलें. ते उपरांत ताच्या बॉलरांनी ल्हान मोखीची येसस्वी रितीन राखण केली.
आर्यन दत्तान लिटन दासाक (3) बाद करून बांगलादेशाक पयलो धपको दिलो. ते उपरांत बांगलादेशाच्या डावाक गळटी लागली. मेहदी हसन मिराज (35), महमदुल्लाह (20) आनी मुस्तफिजूर रहमान (20) हांचो अपवाद सोडलो जाल्यार बांगलादेशाच्या एकाय बॅट्समनाक खेळपट्टीचेर तग धरपाक जमलो ना. अखेरेक बांगलादेशाचो डाव 142चेर सोंपलो. नॅदरलॅण्डा वतीन पॉल मिकरेनान 4, डी लिडेन 2 जाल्यार आर्यन दत्त, वॅन बिक आनी एकरमन हाणें दरेकी एक विकेट घेतली.
ते पयलीं पयलीं बॅटींग करपी नॅदरलॅण्डाची सुरवात तितलीशी बरी जावंक नाशिल्ली. पूण, मुखेली स्कॉट एडवड्साची 68 धांवड्यांची खेळी आनी एंगलब्रिच (35) आनी वॅन बिक (नाबाद 23) हांचे खेळी नेटार नॅदरलॅण्डाक निर्धारीत 50 ओव्हरींनी सगल्यो विकेटी वगडावन 229 धांवड्यां मेरेन मजल मारप शक्य जालें. बांगलादेशा वतीन शोरिफूल इस्लाम, तस्किन अहमद, मेहदी हसन आनी मुस्तफिजूर रहमान हाणें दरेकी दोन विकेटी घेतल्यो, जाल्यार शाकिब अल हसनाक एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
