भांगरभूंय | प्रतिनिधी
नुस्तेकारांचो प्रस्न परत एक फावट जाळांत फारावला. तशी ही दरवर्साची गजाल. पूण, अंदूं पावसा पयलींच नुस्तेकार कागाळ करपाक लागल्यात. नुस्तेमारी बंदी जाता, तेन्ना भायले ट्राॅलर गोंयचे शिमेंत येवन नुस्तेमारी करतात, एलईडी लायट घालून नुस्तें धरतात, अशें गोंयकार नुस्तेकार सांगतात. मात, हालींसराक ही सदचीच समस्या जाल्या. बाणावलेच्या नुस्तेमारांनी कर्नाटक आनी हेर राज्यांच्या बोटींक लागून नुस्त्याचें प्रमाण देंवलां, अशें म्हणलां. नामनेचे नुस्तेमार पेले फर्नांडीस हांणी सांगलें, पयलीं फांतोडेर दर्यांत गेले काय चार व्हडले पाटले तरी नुस्तें मेळटालें. मात, आतां एक पसून मेळना. कारण थंय पयलींच भायल्या बोटींनी नुस्तेमारी केल्ली आसता. त्यो फांतोडेर परत वतात. देखून सगलें नुस्तें ते फारावन वतकच थोडें कितें उरता तें गोंयकारांक मेळटा.
खरें म्हणल्यार दुसऱ्यांचे हद्दींत वचून नुस्तें मारपाक मेळना. पूण, हो नेम कोण पाळिनात. बेधडक एकामेकांच्या राज्यांनी (दर्यांनी) वचून बोटी नुस्तें घेवन पपा काडटात. येतनाच त्यो 10, 12 चे संख्येन येतात. म्हणटकच एखाद्या ट्राॅलरा वयल्या कामगारांनी तांचे कडेन केस्तांव करप धोक्याचें. तातूंत त्यो स्पीड बोटी. वेगान वचपी. हाचेर तटरक्षक दळान कितें तरी उपाय काडपाक जाय. तांकां फोन केल्यार तांच्यो बोटी येता म्हणसर वर- देड वर तरी लागताच. तातूंत तांचे कडेन स्पीड बोटी नात, अशें पेले सांगता. निदान केंद्र, राज्य सरकारान तांकां त्यो दिवपाक जाय. कारण दर्यांत आतां फक्त बेकायदेशीर नुस्तेमारीच जायना, तर हेर धंदेय चलतात. बेकायदो गजालींक आळाबंद हाडटलो जाल्यार सगलें कितें वेगवान, अत्याधुनीक जाय. भायल्या बोटींनी तटरक्षक दळाच्या हाताक आमी लागपाचे नात, हें आपले मतींत कोरांतलां. ताका लागून त्यो कोणाक भियेनासतना मेळत थंय, मेळत तेन्ना, मेळत तितली नुस्तेमारी करतात. एलईडी बल्बाच्या उजवाडाक दिपकावन वा आकर्शीत जावन नुस्तें लागीं येता आनी जाळांत फारावता. हातूंत नुस्त्याचीं ल्हान पिलांय आसतात. अशें नाका जाल्ले पद्दतीन नुस्तें मारप चालूच उरलें जाल्यार फुडाराक नुस्त्याची पैदासूच जावची ना. मागीर ताटांत फक्त बांगडे, लेफो आनी तारलेच. सध्याच हाची सुरवात जाल्या.
नुस्तेमारी बंदीच्या काळांतूय वेगळें कितें जायना. दर्या खवदळिल्लो आसतनाय कांय नुस्तेमार दर्यांत वतात. ह्या काळांत नुस्तें उथळ उदकांत तांतयां घालपाक येता. ताकाच लागून नुस्तेमारी बंदी घाल्ली आसता. दर्याक उंचाबळ जाल्लो आसता. दुर्घटनां जावच्यो न्हय, होय उद्देश आसता. आमचे पूर्वज श्रावणांत शिवराक जेवताले, हें फुडाराक चड नुस्तें मेळचें हेच खातीर. श्रावणांतले हे नुस्ते बंदीक लागून आदल्या तेंपार नुस्त्याची पैदास व्हड प्रमाणांत जाताली. आतां व्हडल्यो बोटी पावसांत दर्या धडे लागसार नुस्तें मारतात. ह्या काळांत फक्त रापोणकारांक परंपरीक पद्दतीन नुस्तें धरपाची परवानगी आसता. पूण कायदो पाळप जायना. आयज बंदी ही फक्त नांवा पुरती उरल्या. देखूनच पोरूं रापोणकारांचो एकवट संघटणेन बंदी दोन म्हयन्यां बदला तीन म्हयने करची, अशी मागणी केल्ली. हेर राज्यांनी नुस्तेमारी बंदी काळांत लुकसाण भरपाय मेळटा, ती गोंय सरकारानूय दिवची, अशीय तांची मागणी आशिल्ली.
दुसरी गजाल फाॅर्मेलीनाची. तें अजूनय वापरतात काय ना, तें नुस्तेमारी खात्याक खबर आसतलें. भायल्यान ट्रकांनी येवपी नुस्तें इबाडचें न्हय म्हूण ताका फाॅर्मेलीन लायतात. हें मेल्ल्या मनशाची कूड कुसची न्हय म्हूण लायतात. कांय वर्सां पयलीं ताचे वयल्यान व्हडलो बोवाळ जाल्लो. नुस्तें सांठोवन दवरपीय तें वापरतात, असोय आरोप जाल्लो. तातूंत तथ्य ना, अशें म्हणपाक मेळचें ना. कारण, आमच्या देशाच्या म्हान मनशांनी दुदांत युरिया सारें, शांपू घालपाचो पराक्रम केला, हें खबरां चॅनलांचेर हाचे पयलीं दिसलां. तांकां फाॅर्मेलीन सारकें आनी युरियाय सारकेंच. बाजारांत विकपाक बसतात तें नुस्तें ताजें आसा काय ना. बाजारांत नितळसाण आसा काय ना, हाचीय सरकारी यंत्रणेन तपासणी करपाक जाय. नुस्त्याची पैदास वाडपाक जाय. कारण जायते तरांचें नुस्तें आयज पळोवपाक पसून मेळना. नुस्त्याक म्हारगायेन घांस मारला, तो सुटपाक जाय. नुस्त्याचे बाबतींत हें अशेंच चालू उरलें जाल्यार वीर गोंयकार नुस्त्या बगर व्हीर जातले. कवी बाकीबाबांचीं हीं उतरां खरीं थारपाचो वेळ लागीं आयला काय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
