नुस्तेमारी वेवसाय लेगीत गोंयकारांच्या हातांतल्यान वताः मुख्यमंत्री

भांगरभूंय | प्रतिनिधी

पणजीः नुस्तेमारी वेवसाय गोंयकारांच्या हातांतल्यान वचचा न्हय, हे खातीर दरेक पंचायतींत एक वेवसायीक तयार जावप गरजेचे आशिल्ल्याचे मत मुख्यमंत्री डॉ. प्रमोद सावंत हांणी उक्तायलें. सोमारा नुस्तें उद्देग खात्या वतीन आयोजीत सुता पुनवेच्या कार्यावळींत ते उलयताले.

ह्या वेळार मंत्री नीळकंठ हळर्णकार, संचालक डॉ. शमिला मोंतेरो, सचीव ई वल्लभन, महापौर रोहीत मोन्सेरात आनी हेर अधिकारी हाजीर आशिल्ले. ह्या वेळार नुस्तें वाहिनी आनी नुस्तें आहार, कृत्रीम कोरल रीफ ह्या येवजण्यांक सुरवात केली.

आदीं नुस्तेमारी वेवसाय फकत गोंयकारांच्या हातांत आशिल्लो. घरांघरांनी भोवन नुस्तें विकपी व्यक्ती कोंकणींतल्यान उलयताले. आयज मात वेगळीच भास आयकुपाक मेळटा. हो वेवसाय गोंयकारांच्या हातांतल्यान वच्चो न्हय, हे खातीर गोंयकारांनी खासा करून तरणाट्यांनी फुडाकार घेवप गरजेचें आसा. ह्या वेवसायांत अर्थीक फायदो लेगीत आसा. सरकार वेवसायिकांक सगली मजत करपाक तयार आसा. खात्या वतीन तंत्रीक आनी अर्थीक मजत लेगीत करतात, अशें मुख्यमंत्री डॉ. प्रमोद सावंत हांणी सांगलें.

तांणी म्हणलें, नील क्रांतीचे सपन पुराय करतना दर्याची नितळसाण राखप लेगीत तितलेच म्हत्वाचें. जायत्या जाणांक निर्माल्य, प्लास्टीक पोतयो वा हेर कोयर दर्यांत उडोवपाची संवय आसा. जाल्यार कांय उद्देग लेगीत प्रक्रिया करुंक नाशिल्ले उद्देग लेगीत थेट दर्यांत उदक सोडटात. ताका लागून दर्यांत प्रदुशण वाडत आसा. तशेंच असो कोयर नुस्त्यांच्या पोटांत वचून तो परतून मशाच्या कुडींत येवपाची शक्यताय आसता. ते खातीर नाल्ल पुनवे दिसा आमी सगल्यांनी दर्यांत कोयर उडोवचे नात, असो सोपूत घेवपाक जाय.

————————

दरेक शारांत नुस्तें वाहिनी

सवाय दरांत नुस्तें दिवपाक सुरू केल्ली नुस्तें वाहिनी ही सेवा फुडल्या कांय काळांत राज्यांतल्या सगल्याच शारांनी उपलब्ध करून दिवपाचो सरकाराचो यत्न आसतलो. येवजणे खाला दिल्लो दुचाकी वा तीन चाकी हेर कारणां खातीर वापरिल्ल्याचे दिसून आयल्यार त्यो परतून काडून घेतले, अशें मुख्यमंत्र्यांनी सांगलें.

——————————-

फुडल्या वर्सांच्यान बीएससी फिशरीज

फुड्या शिक्षणीक वर्सां पसून बीएससी इन फिशरीज सायन्स हो अभ्यासक्रम सुरू करपाचो सरकाराचो विचार सुरू आसा. ताका लागून थळाव्या विद्यार्थ्यांक शिक्षणा खातीर दुसऱ्या राज्यांत वचपाची गरज पडची ना, अशें मुख्यमंत्र्यांनी सांगलें.

—————————–

200 कोटींचे प्रकल्प प्रस्तावीत

खात्याची संचालक डॉ. शमिला मोंतेरो हांणी सांगलें, राज्यांतलाले नुस्तें वेवसाय वाडोवपा खातीर खात्या वतीन सुमार 200 कोटी रुपयांचे प्रकल्प प्रस्तावीत केल्यात. हातूंत हातूंत नुस्तें दवरपाच्या सुवातेची उदरगत तशेंच नुस्तेमारी गांवांत आधुनिकीकरण करप हाचो आस्पाव आसा.