भांगरभूंय | प्रतिनिधी
मुख्यमंत्री : एक्वा फीश फेस्टीवलाचें उक्तावण
भांगरभूंय । प्रतिनिधी
पणजी : नुस्त्यांच्या उत्पन्नांत वाड करप, प्रक्रिया युनिट आनी कॉल्ड चेन सारकिल्ल्या सुविधांचो उणाव भरून काडप आनी आधुनीक तंत्रज्ञाना वरवीं नुस्तेकारांचे रोजगार संदीक घटसाण दिवप हो एक्वा गोवा फीश फेस्टावलाचो हेतू आसा. नुस्तेमारी वेवसायाक तेंको दिवन आमी गोंयची सांस्कृतीक वळख सांबाळून दवरतात, अशें मुख्यमंत्री डॉ. प्रमोद सावंत हांणी सांगलें.
पणजे शुक्रारा एक्वा गोवा फीश फेस्टीवलाच्या निमतान खाशेल्या परिसंवादाचें मुख्यमंत्री डॉ. प्रमोद सावंत हांचे हस्तुकीं उक्तावण जालें. ह्या वेळार नुस्तेमारी मंत्री निळंकठ हळर्णकार, नुस्तेमारी सचीव प्रसन्न आचार्य आनी हेर मानेस्त हजर आशिल्ले.
तीन दीस चलपी एक्वा गोवा फीश फेस्टीवलांत गोंयकार वांटेकार जातले. ह्या दिसांनी वेगवेगळ्या तरांचें नुस्तें आमकां खावपाक आनी पळोवपाक मेळटलें, अशे मुख्यमंत्र्यान सांगलें.
ह्या निमतान घडोवन हाडिल्लो राष्ट्रीय परिसंवाद धोरण निर्माते, विज्ञानीक, संशोधक, उद्देग भागधारक आनी समुदाय प्रतिनिधींक एके माचयेर हाडून नुस्तेमारी मळ आनी सरकारी आराखड्याक घटसाण दिवपा सयत समुद्री पर्यावरण यंत्रणेंत जैवविविधतायेच्या संवर्धनाक उर्बा दिवपाची मोख दवरता. जेन्ना आमी नुस्तेमारी मळाक तेंको दितात, तेन्ना आमी ह्या मळाचेर निंबून आशिल्ल्या कुटुंबांक तेंको दिवन गोंयची सांस्कृतीक वळख सांबाळून दवरतात, अशें मुख्यमंत्र्यान सांगलें.
नुस्तें आनी नुस्तें वेवसाय गोंयच्या काळजाक लागींचो आसा. गोंयांत नुस्तें म्हणटा ती सदांची जीण, संवय आनी सोयऱ्यांक येवकार दिवपा खातीर कितें रांदप हाचो भाग जावन आसा. ताज्या नुस्त्याचें मोल कितें तें चडश्या गोंयकारांक खबर आसा आनी आमच्या मदले खूब जाण सकाळीं फुडें व्हडीं आनी नुस्त्यां बाजारांतलो आवाज आयकून व्हडले जाल्यात. गोंयकाराचे खूबश्या मुद्द्यांचेर मतभेद आसतले, पूण चर्चेंत जेन्ना नुस्त्याचो विशय येता तेन्ना सगले तज्ञ जातात, अशें मुख्यमंत्र्यान म्हणलें.
नुस्त्याच्या ताटा फाटल्यान खरे यत्न आसतात ते नुस्तेकार भावांचे. आमचे नुस्तेकार भाव सकाळीं फुडें उठून खूब वरां मेहनत करतात आनी अदमास नाशिल्ले स्थितीक तोंड दितात. हें काम सोंपें न्हय, हाका कुशळटाय, पाशियेंस आनी धाडस जाय पडटा. ह्या महोत्सवा वरवीं आमी तांकां दिनवास दितात, अशें मुख्यमंत्र्यान सांगलें. ह्या फेस्टीवला वरवीं सगले परंपारीक, आधुनीक नुस्तेकार, नुस्तें वेवसायीक, उद्देजकाक एके सत्रे खाला हाडून ताची उदरगत जावची हे खातीर राष्ट्रीय परिसंवाद घेतात. ह्या मळार चडांत चड नाविन्य कशें हाडप, विज्ञानिकांनी जें काम केल्लें तें लोकां मेरेन पावोवन तांकां गिन्यान दिवन तांकां शाश्वत कशे करप हाचेर भर दितले, अशें नुस्तेमारी मंत्री निळकंठ हळर्णकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
