भांगरभूंय | प्रतिनिधी
पणजीः नुस्त्यांच्या उत्पन्नांत वाड करप, प्रक्रिया युनिट आनी कॉल्ड चेन सारकिल्ल्या सुविधांचो उणाव भरून काडप आनी आधुनिक तंत्रगीन्याना वरवीं नुस्तेकारांच्या रोजगार संदीक बळकटी दिवप हो एक्वा गोवा फिश फेस्टविलाचो हेत आसा. नुस्तेमार वेवसायाक तेंको दिवन आमी गोंयची सांस्कृतीक वळख तिगून दवरतात, अशें मुख्यमंत्री डॉ. प्रमोद सावंत हांणी सांगलें.
पणजे शुक्रारा एक्वा गोवा फिश फेस्टिवालचें निमतान खाशेले परिसंवादाचे मुख्यमंत्री डॉ. प्रमोद सावंत हस्तुकीं उक्तावण जालें. ह्या वेळार नुस्तेमार मंत्री निळंकठ हर्णकार, नुस्तेमार सचिव प्रसन्न आचार्य आनी हेर मानेस्त हाजीर आशिल्ले.
तीन दिस चलपी एक्वा गोवा फिश फेस्टिवलांत गोंयकारांक वाटेकार जावन ह्या दिसांनी वेगवेगळ्या तरांचे नुस्तें आमका खावपाक आनी पळोवपाक मेळटले, अशें मुख्यमंत्र्यांन सांगलें.
ह्या निमतान घडोवन हाडिल्ली राष्ट्रीय परिसंवाद धोरण निर्माते, वैज्ञानिक, संशोधक, उद्देग भागधारक आनी समुदाय प्रतिनिधींक एका माचयेर हाडून नुस्तेमार क्षेत्र आनी सरकारी आराखड्याक बळकटी दिवपा सयत दर्या पर्यावरण यंत्रणेंत जैवविविधतायेच्या संवर्धनाक प्रोत्साहन दिवपाची मोख दवरता. जेन्ना आमी नुस्तेमार क्षेत्राक तेंको दिता तेन्ना आमी ह्या क्षेत्राचेर निंबून आशिल्ले फामिलीक तेंको दिवन गोंयची सांस्कृतिक वळख तिगून दवरतात, अशेंय मुख्यमंत्र्यांन सांगलें.
नुस्तें आनी नुस्तें वेवसाय गोंयच्या काळजाक तेंकूंन आसा. गोंयांत नुस्तें म्हणटा ते सदची जीण, सवय आनी सोयऱ्यांक येवकार दिवपा खातीर कितें रांदप हाचो भाग जावन आसा. ताजे नुस्त्याचें मोल कितें ते चडश्या गोंयकारांक खबर आसा आनी आमच्या मदले खूब जाण सकाळ फुडें बोटी आनी नुस्त्या बाजारातलो आवाज आयकून व्हडले जाल्यात. गोंयकारांचे खुपश्या मुद्द्यांचेर मतभेद आसतले पूण चर्चेत जेन्ना नुस्त्याचो विशय येता तेन्ना सगळे तज्ञ जातात. ह्या महोत्सवा वरवीं आमी तांका कृतज्ञता उक्तायतात अशें मुख्यमंत्र्यांन म्हणलें.
ह्या फेस्टीवला वरवीं सगळे पारंपारीक, आधुनिक नुस्तेकार, नुस्ते वेवसायीक, उद्देजकाक एक सत्रे खाला हाडून ताची उदरगत कशी जावप हे खातीर राष्ट्रीय परिसंवाद घेतात. ह्या क्षेत्रात चडात चड नावीन्य कशें हाडप, वैज्ञानिकांनी जे काम केल्ले ते लोका मेरेन पावोवन तांका गिन्यान दिवन तांका शाश्वत कशे करप हाचेर भर दितले, अशें हळर्णकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
