नुस्तें विक्रेती राधिका कासकाराचीं पावलां शास्त्रीय गायनाच्या मळार

भांगरभूंय | प्रतिनिधी

पेडणें: दुयेंतीक बरो करपाची तांक शात्रीय संगितांत आसा. दीपक रागा वरवीं तानसेन हांणी दिवे पेटयिल्ले, अशें म्हणटात. अशा ह्या शास्त्रीय संगिताच्या मळाचेर नुस्तें विक्रेती राधिका कासकार हांणी पावल घातलां.

हेरशी 24 वरांतलीं सुरवातीचीं 8- 10 वरां आमी न्हिदेंत सोंपयतात. आठ वरां नोकरे खातीर, उरिल्लीं 6-8 वरां स्वता खातीर वा कुटुंबा खातीर वापरतात. पूण सक्रार तोरशेंची राधिका कासकार फक्त दोन वरां न्हिदता. ती सध्या तांबोशे उगवेंचे संगीत शिक्षक नाना असोलकार हांचे कडेन शास्त्रीय गायनाचे धडे घेता. दर दिसा नुस्तें विकून रातच्या 8.30 ते 12 वरां मेरेन नाना आसोलकार हांचे कडेन गायनाचें धडे घेता. रातच्या 12 ते 2 वरां मेरेन न्हीद काडून ती चार चाकी घेवन नुस्तें हाडपाक मालवण, बेतूल, मडगांवां, पणजे एकेक दीस वता.

नुस्तें विकपी अस्तुरेक संगीत मळाची आवड कशी निर्माण जाली, हाची उमळशीक लागिल्ल्यान तिचे कडेन संवाद सादलो.

राधिका सध्या नुस्तें विकता. तिणें दोन हॉटेलांय सुरू केल्यांत. तातूंत 10-15 जाणांक रोजगार तयार केल्यात. दिसाच्या 24 वरांचें तिणें वेवस्थीत नियोजन केलां. एक वेळ ती नुस्तें विकपाक विसरत, पूण संगिताचो रियाज करपाक ती विसरना.

राधिकान सांगलें, तोरशेंची सरपंच प्रार्थना मोटे हांणी आपल्या महिला भजन पंगडांत वांटेकार जावचे खातीर उर्बा दिली. संगीत शिक्षक नाना आसोलकार हांचे कडेन पंगडा वांगडा भजन शिकपाक गेली. भजन शिकता शिकता शास्त्रीय गायन शिकचें, अशें दिसलें. आरोलकार हांच्या मार्गदर्शना खाला सध्या शास्त्रीय गायनाचे धडें घेतां. आरोलकार हांच्या वर्गांत संगिताचे सूर कानार पडटकच सगळो शीण, दगदग ना जाता. संगितांत जी शक्त आनी तांक आसा, तशी आनी खंयच्याच मळार ना. गुरुच्या आशिर्वादान ह्या मळाचेर खूब शिकपाचें आसा. ह्या मळाचेर आयिल्ल्यान मनाक खूब समाधान मेळ्ळां, अशें राधिका हांणी सांगलें.

राधिकाचें 20 नोव्हेंबराक गायनः आसोलकार

एक अस्तुरी दीसभर नुस्तें विकून संगिताचे धडे कशी घेतली, हो आपले मुखार व्हड प्रस्न आशिल्लो. वेळाक पाळो दिवन भजन शिकपी अस्तुरेचें एक समजूं येता, पूण शास्त्रीय संगिताचे धडे घेतना वेळाकाळाची मर्यादा आसना. हें राधिकाक जमचें ना, अशें दिशिल्ल्यान सुरवेक तिका आपणें शिकोवपाक न्हयकार दिलो. पूण शास्त्रीय संगीत शिकपाची जिद्द पळोवन आपलो निर्णय बदलचो पडलो. 20 नोव्हेंबराक गुरुकृपा संगीत सुवाळ्यांत राधिका कासकार हिचें गायन जातलें, अशें तिचे संगीत शिक्षक नाना आसोलकार हांणी सांगलें.