भांगरभूंय | प्रतिनिधी
आ मच्या ल्हानशा राज्याक वट्ट 105 किलोमिटरांची दर्यादेग मेळ्ळ्या, हाचे खातीर गोंयकारांक नुस्त्याचें पिशें आसप, तें आवडप हातूंत अजाप कांय ना. पेंवपाकूय येवप हातूंत नवें कांय ना. नुस्तें खावपाक वा पेंवपाक आवडटा आसूं पूण ह्या फाट्यांत शिकपा खातीर आमी उत्सुक आसनात. सांगपाक वायट दिसता की गोंयांत नुस्त्याचें शिक्षण दिवपी पदवी कॉलेज ना. जर एखाद्याक हें शिकपाचें आसत तर आजून लेगीत गोंयां भायर वच्चें पडटा. खरेंतर ह्या खात्याच्यो कितल्योशोच येवजणी आसात जाचे लाव आमी घेवं शकतात. एक बरी गजाल म्हळ्यार ह्या फाट्यान जर तुमी पदवी वा पदव्युत्तर शिकप घेतलें जाल्यार नीट परीक्षा दिवपाची गरज ना, पूण विज्ञान फाटो मात घेवपाक जाय. तुमकां प्रवेशा खातीर सुवाती आसात, मात प्रवेश परीक्षा ही दिवचीच पडटली. गोंयांतली प्रवेश परीक्षा फुडल्या वर्सा सावन आसची ना. ताच्या सुवातेर जे ई ई मेन्स परीक्षा म्हत्वाची थारतली.
गोंयांन 105 किमी दर्यादेगर आशिल्ल्या कारणान ह्या फाट्याची विद्यार्थ्यांनी निवड करपाक जाय आशिल्ली, पूण तशें चुकूनच घडता. नुस्त्या खेरीज गोंयंकार रावूं शकना तो जर गोंयां भायर गेलो तर गोंयची आनी गोंयच्या नुस्त्याची ताका याद येता पूण ताचेर अभ्यास करून पदवी घेवपाक आमी फाटीं कित्याक? सद्या गोंयांत ह्या फाट्यांतलें पदवी शिक्षण दिवपी सुविधा नाशिल्ल्या कारणान शिकपा खातीर गोंयां भायर वच्चें पडटा. हाची पदवी जर तुमी घेवपाक इत्सुक आसात तर तुमी धावी उपरांत विज्ञान फाटो तुमकां घेवचो पडटलो. पी सी बी हो गट घेवन तुमी हें शिकप करूंक जाय. गणित घेतल्यार बरेच. देश स्वतंत्र जालो तेन्ना नुस्त्याचें उत्पादन 7. 13 लाख टन आशिल्लें ते आतां 37 लाख टनांचेर पावलां. भारताचो नंबर संवसारांत तिसरो लागला.
लागीचें कॉलेज सोदताना तुमी तांच्या संकेतस्थळाचो विचार करूं शकता. आमकां महाराष्ट्रांतलीं कॉलेजां लागीचीं आसात. हाचें कारण म्हळ्यार भास आनी राहणीमान. पूण तुमी तुमकां झेपता तें कॉलेज घेवचें. भोवतेक कॉलेजांनी तुमकां पदवी, पदव्युत्तर तशेच पी एच डी करपाक मेळटा. ह्या फाट्यान जर तुमी वचूंक सोदतात तर बायोलॉजी विशयाचो सारखो अभ्यास करात, तातूंत आवड निर्माण करात. विंगड विंगड नुस्तीं कशीं असतात, तांची शरीर रचणूक कशी आसा ह्यो गजाली तुमी प्रवेश घेवचे पयलीं शिकूं शकतात. पुस्तकां तशेंच नेटाच्या मजतीन हें सहज जावं शकता. पारंपरिक आनी आधुनिक हिं झगडी सगळ्या फाट्यांनी पळोवपाक मेळटा. नुस्त्याचो फाटो ताका आडवाद कसो आसतलो ? मशीनां व्हड्यांक लावन नुस्तें हाडपी लोक चड नुस्तें हाडपाक लागले आनी पारंपरिक जाळें घेवन नुस्तें धरपी थंयच उरले. आता तर ट्रॉलर आसात. एक मात आमी विसरूंक फालवन की नुस्तेकांरांक भरती आनी सुकती, पेंवप हें शिकोवचें पडटा. पूण बाकीच्यांक हें शिकप गरजेचें. ह्या फाट्यान गेले तर पदवी, पदव्युत्तर, पी एच डी तर करतलेच खेरीज सरकारी, खाजगी नोकरी मेळूं शकता. देशा भितर नुस्त्याचो वांटो 72 % आसा. त्या खेरीज 2. 4 लाख फिशिंग क्राफ्ट्स आसात, सात व्हड बंदरां आसात. ह्या वेवसायांत देशभर 40 लाखां वयर लोक आसात ह्या धंद्यान कश्ट आसात, पूण फायदो लेगीत खूब आसा. खेरीज तुमी हेरांक नोकरी दिवं शकतात.
Quaculturist Aquatic Biologist Biological Technician, Customs Inspector Environmental Specialist , Fish Culturist , Fish Hatchery Manager , Fish & Game Warden Fish & Wildlife Assistant Fish & Wildlife Scientific Aide, Fisheries Biologist Fisheries Technician Habitat Restoration Specialist , Marine Biologist Marine Extension Agent Research Biologist Reservoir Manager , Special Agent , Wastewater Treatment Analyst Water Quality Advisor, Watershed Restoration Specialist अशे करियरची फांटे आसात. अर्थात हें करपाक तुमकां गोंय सोडचें पडूं येता. ती मनाची तयारी दवरात.
नुस्तेमारी खात्याकूय तुमी भेट दिवं शकतात. तें दयानंद बांदोडकार मार्ग, पणजे आसा. फोन – 2224838, ईमेल : dir-fish[dot]goa[at]nic[dot]in, वेबसायट -fisheries.goa.gov.in. हांगा वचून तुमी नुस्तेमारी विशींच्या येवजण्यांची म्हायती घेवं शकता. तांचें संकेतथळ पयलीं पळोवचें.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
