भांगरभूंय | प्रतिनिधी
सांकोड्डेंचे ग्रामसभेंत थारावः पंचायत मंडळा कडल्यान घाळपणां जाल्ल्याचें मान्य
भांगरभूंय । प्रतिनिधी
फोंडें: सांकोड्डें पंचायत मंडळान फाटल्या 15 दिसांत केल्ल्या घाळपणाक लागून लोकांक दुशीत उदक पियेवचें पडटा, अशें पंचायत मंडळान ग्रामसभेंत मानून घेतलें. दूशीत उदक सोडिल्ल्या नुस्त्या पोसपाच्या प्रकल्पाक दिल्लो परवानो फाटीं घेतला.
गांवांतल्या लोकांचे भलायके खातीर पंचायत मंडळान शुद्ध उदक पुरवण करची. नुस्तें पोसपाच्या प्रकल्पाक सील मारचें आनी हेर म्हत्वाचे थाराव आयतारा जाल्ले खाशेले ग्रामसभेंत घेतले.
सरपंच प्रिया खांडेपारकार फाटल्या कांय दिसांच्यान रजेर आशिल्ल्यान उपसरपंच शिरीष देसाय हांचे अध्यक्षते खाला आयतारा खाशेली ग्रामसभा घेतली. ग्रामसभेक लोक व्हड संख्येन हाजीर आशिल्ले.
नुस्तें पोसपाच्या प्रकल्पांतल्यान दुशीत उदक रगाडा न्हंयेंत सोडिल्ल्याचें कांय दिसां आदीं उपसरपंच देसाय हांणी उजवाडाक हाडिल्लें. हे खातीर पंचायतीन प्रकल्पाक दिल्लो परवानो फाटीं घेवपाचो निर्णय घेतलो, अशें तांणी स्पश्ट केलें. प्रकल्पा आड खर कारवाय करपाक व्यस्त उरिल्ल्यान विवीध खात्यां कडेन पत्र वेव्हार करपाक वेळ मेळूंक नाशिल्ल्याचें तांणी आदींच स्पश्ट केलें.
आदल्या पंचायत मंडळान 18 ऑक्टोबर 2021 ह्या दिसा प्रकल्पाचे एके तळयेक परवानगी दिवपाचो थाराव सभेंत एके ओळींत घेतिल्लो. त्या थारावाक सुचक आनी अनुमोदक नाशिल्लो. तशेंच प्रकल्पांत एके तळये बदला सात तळयांनी नुस्तें पोसताले, अशें चवकशेंत स्पश्ट जालें. ताका लागून थळाव्या लोकांनी तेन्नाच्या पंचायत मंडळाचेर कारवाय करपाचो थाराव घेतलो, अशी म्हायती उपसरपंचान दिली.
फाटल्या 15 दिसांत दुशीत उदकाचो प्रस्न साणीर आसून लेगीत पंचायत मंडळान लोकांक नितळ उदक दिवपाचो यत्न करूंक ना. तशेंच भौशीक बांदकाम खात्याचे सहाय्यक अभियंते देविदास बोरकार हांणी उदक नितळ आशिल्ल्याचो दावो केल्लो अहवाल पुराय चुकीचो आसा. ताका लागून सहाय्यक अभियंत्याची तत्काळ बदली करपाचो तशेंच लोकांक नितळ उदकाची पुरवण करपाचो थाराव ग्रामसभेंत घेतलो. पंचायत मंडळान दुशीत उदकाचे नमुने तपासणे खातीर धाडले, पूण ते आदीं कसलोच पत्रवेव्हार करूंक नाशिल्ल्याचें उपसरपंच देसाय हांणी मान्य केलें. 2- 3 दिसांनी अहवाल मेळ्ळे उपरांत लोकांक नितळ उदकाची पुरवण करचे खातीर विवीध खात्यां कडेन पत्रवेव्हार करतले. तशेंच रोखडेच भौशीक बांदकाम मंत्री तशेंच मुख्यमंत्री आनी हेर संबंदीत खात्यांच्या अधिकाऱ्यांची भेट घेवन नितळ उदका पुरवण करपा संबंदांत ठोस निर्णय घेतले, अशें देसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
