नुस्तें जालें उणें
भांगरभूंय | प्रतिनिधी
- दर्यांतलें उत्पादन पोरूं 6,980 टनांनी देंवलें
- बांगडो, ताल्ले, विस्वण उण्या प्रमाणार मेळ्ळे
- जमनी वयल्या उत्पादनांत जाली वाड
भांगरभूंय । प्रतिनिधी
पणजीः गोंयांतल्या दर्यांतलें नुस्तें उत्पादन 6,980 टनांनी देंवलें. तातूंत बांगडे, ताल्ले, विस्वणाचेंय प्रमाण उणें जालां. जाल्यार जमनी वयल्या नुस्तें उत्पादनांत 2,343 टनांनी वाडलें.
विधानसभा अधिवेशनांत आमदार विरेश बोरकार हांणी विचारिल्ल्या लेखी प्रस्नाक नुस्तेमारी मंत्री नीळकंठ हळर्णकार हांणी दिल्ले जापेंतले आंकडेवारींतल्यान ही गजाल उजवाडाक आयल्या.
2021- 22 त दर्यांतलें नुस्तें उत्पादन 1,10,724 टन आशिल्लें. 2022- 23 त तातूंत 23,246 टनांनी वाड जावन तें 1,33,970 टन जाल्लें. पूण 2023- 24 त तातूंत 6,980 टनांनी उणाव जावन अंदूं ते 1,26,990 टन जालां. दुसरे वटेन जमनीचेर जावपी नुस्तें उत्पादन 2022- 23 त 6,308 टन आशिल्लें. पोरूं तातूंत 2,343 टनांनी वाड जावन तें 8,651 टन जाल्ल्याचें जापेंतल्यान कळटा.
8,166 टन निर्गत देंवली
2004 त दर्यांतल्या नुस्त्याची निर्गत 8,166 टन देंवल्या अशें मंत्री नीळकंठ हळर्णकार हांणी दिल्ले जापेंतले आंकडेवारींतल्यान दिसता. 2022- 23 त गोंयांतल्यान 63,333 टन नुस्त्याची निर्गत जाल्ली. जाल्यार पोरूं 55,167 टन नुस्त्याची निर्गत जाल्ल्याचें जापेंतल्यान दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
