भांगरभूंय | प्रतिनिधी
आलेक्स सिक्वेराः कोयर प्रक्रिया प्रकल्प हो आदलो विशय
भांगरभूंय । प्रतिनिधी
मडगांवः नुवें मतदारसंघांत कसल्योय समस्या आसल्यार आपले कडेन त्यो मांडपाची गरज आशिल्ली, पूण आपले कडेन कोणूच येवंक ना. कोयर प्रक्रिया प्रकल्प हो विशय आदींच्यान आसा. पूण कांय जाणांक ताचें फक्त राजकारण करपाचें आसा, अशें मंत्री आलेक्स सिक्वेरा हांणी सांगलें.
दक्षीण गोंय जिल्होधिकारी कार्यालयांत लोकांच्यो समस्या समजून घेवचे खातीर मंत्री सिक्वेरा आयिल्ले. नुवेंच्या कांय लोकांनी मंत्री बाबूश मोंसेरात हांची भेट घेतली आनी समस्या मांडल्यो. हे विशीं मंत्री सिक्वेरा हांकां विचारिल्लें तेन्ना तांणी वयली गजाल सांगली.
नुवेंच्या लोकांक जर कसल्योय समस्या आसत जाल्यार आमदार म्हूण तांणी आपले कडेन संपर्क करपाची गरज आशिल्ली, पूण तशें जावंक ना. कांय जाणांनी घनकोयर वेवस्थापन खात्याच्या अधिकाऱ्यांची आनी मंत्र्याची भेट घेतिल्ल्याचें आपल्या कानार पडलां. आपले कडेन कसलीच समस्या त्या लोकांनी मांडूंक ना. कोयर प्रक्रिया प्रकल्पाचो विशय आदींच्यान आसा, पूण त्या वेळार कोणूच काय उलोवंक नाशिल्ले. आतां कांय जाणांक तातूंत राजकारण करपाचें आसा, अशें मंत्री सिक्वेरा हांणी सांगलें.
राष्ट्रीय म्हामार्गा खातीर 400 चौखण मिटर जमीन दिवपाक तयार आसात, अशें सांगपाक जमीन धनी आयिल्ले, पूण ती जमीन बागायतींची आशिल्ल्यान कायद्या प्रमाण ती जमीन तशें तरेन दिवपाक मेळना. ताका लागून तिचें कशें तरेन दिवपा योग्य करपाक मेळटली हाचेर विचार करपाक सांगलां, अशें मंत्री सिक्वेरा हांणी सांगलें.
सुण्यान घांस मारिल्ल्यान 7 वर्सा पिरायेच्या भुरग्याक मरण येवपाची घडणूक दुखदिणीं आसा. हे घडणुके उपरांत मंत्री हळर्णकार हांणी चर्चा करून सुण्यांच्या कांय जातींचेर बंदी संबंदांत निर्णय घेतले, अशें विधान केलां. कांय राज्यांनी सुण्यांच्या थारावीक जातींचेर बंदी आसा, अशेंय मंत्री सिक्वेरा हांणी सांगलें. गोंय राज्य प्रदुशण नियंत्रण म्हामंडळा वतीन करतात तो एरियल सर्वे बंद केला. हो विशय फेब्रुवारीच्या अधिवेशनांत चर्चेक आयिल्लो. दर्यादेग वाठारांतलें मॅपींग आनी सर्वे हो गोंय दर्यादेग वाठार वेवस्थापन ऑथरिटी कडल्यान गोंय प्रदुशण नियंत्रण म्हामंडळाच्या आदारान करताले. पूण प्रदुशण नियंत्रण मंडळाचें बेकायदो बांदकाम सोदपाचें काम न्हय, हे खातीर तें काम बंद केलां. तशेंच सर्वेचें काम दुसरे कंपनीक दिल्लें, पूण राज्य सरकारा कडेन ड्रोन आनी हेर सुविधा आशिल्ल्यान ते तांचे कडल्यानूच करून घेवपाचें थारायलां. हाका लागून कामाचो खर्च खूब उणो जातलो, अशें मंत्री सिक्वेरा हांणी सांगलें.
मांस विक्रेत्यांचे प्रदुशण मंडळा कडेन अर्ज
एसजीपीडीए किरकोशळ मार्केटांतल्या मांस विक्रेत्यांच्या प्रस्नाचेर उपाय काडटात. सुमार 27 चिकन विक्रेत्यांतल्या 21 जाणांनी गोंय प्रदुशण नियंत्रण मंडळा कडेन वेवसाय करचे खातीर अर्ज सादर केल्यात. तशेंच हेर बीफ आनी मटण विक्रेत्यां कडल्यान अर्ज सादर जाल्यात. एसजीपीडीए कडल्यान लेगीत घाणयारें उदक प्रक्रिया प्रकल्प उबारचे खातीर यत्न चल्ल्यात. ती समस्या लेगीत बेगिनूच सुटावी जातली, अशें मंत्री आलेक्स सिक्वेरा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
