भांगरभूंय | प्रतिनिधी
कथ्थक, ओडिसी अशे विवीध शास्त्रीय नाच प्रकार पळोवपाक मेळटली संद
पणजी: कला अकादमी गोवा आनी पश्चीम क्षेत्र सांस्कृतीक केंद्र, उदयपूर हांच्या जोड पालवान आयोजीत देशांतल्या नामनेच्या नाच महोत्सवांत येवपी ’नुपूर’ हो शास्त्रीय नाच महोत्सव अंदूं ता. 10, 11 आनी 12 मार्चाक आयोजीत केला. म्हार्दोळच्या श्रीमहालसा संस्थानाच्या जोड पालवान श्री महालसा देवस्थानाच्या आंगणांत सांजेच्या 7 वरांचेर राष्ट्रीय आनी आंतरराष्ट्रीय नामनां मेळयल्ले तशेंच गोंयचे नाच कलाकार ह्या महोत्सवांत वांटेकार जातले. अंदूंचो हो 28 वो महोत्सव आशिल्ल्यान अंदूं भरतनाट्यम, कथ्थक, ओडिसी ह्या विवीध शास्त्रीय नाच प्रकारांत नामनेच्या कलाकारांची अदाकारी पळोवपाची संद गोंयच्या रसिकांक मेळटली.
’नुपूर’ महोत्सवाचें उक्तावण शुक्रार ता. 10 मार्चाक सांजेच्या 7 वरांचेर श्रीमहालसा संस्थान समितीचे अध्यक्ष प्रेमानंद कामत हांचे हस्तुकीं आनी कला अकादमीचे वांगडी सचीव विनेश आर्लेकार हांचे हाजेरींत जातलें.
उक्तावण कार्यावळीक जोडून ता. 10 मार्चाक सांजेच्या 7 वरांचेर गोमंतकीय नृत्यकलाकार साईश नायक आनी निधी रायकार ह्या कला अकादमीच्या भारतीय संगीत आनी नाच विभागांतल्या विद्यार्थ्यां वांगडा भरतनाट्यम कोरियोग्राफी प्रस्तूत करतले. हातूंत मंजुषा महाले, आकृती ताम्हणकार, गौरी शानबाग आनी अमिषा अडकोणकार ह्यो विद्यार्थिनी वांटेकार जातलीं. कला अकादमीच्या भारतीय संगीत नाच विभागांतली भरतनाटयमची व्याख्याती डॉ. सपना कोचरेंकार नायक हांणी नाचाचें संयोजन केलां. ह्या भरतनाट्यम नाचाक जोडून पुणेची शर्वरी जमेसीस हांचो कथक नाच सादर जातलो.
शेनवार ता. 11 मार्चाक सांजेच्या 7 वरांचेर गोंयची अर्पिता शिरोडकार हांची कला अकादमीच्या भारतीय संगीत आनी नाच विभागांतल्या विद्यार्थ्यां वांगडा कथक कोरियोग्राफी सादर जातली. हातूंत आर्या रेगे, साक्षी शेटये, श्रुती गांवस आनी नवमी नायक ह्यो विद्यार्थिनी वांटेकार जातल्यो. ह्या कथक नाचाचें संयोजन कला अकादमीच्या भारतीय संगीत नाच विभागांतली कथकाची व्याख्याती वरदा बेडेकार करतली. ह्या कथक नाचाक जोडून बंगळुरुची नाच कलाकार रम्या सुरेश भरतनाट्यम नाच प्रस्तूत करतली.
आयतार ता. 12 मार्चाक सांजेच्या 7 वरांचेर गोंयची प्रज्ञावंत नृत्यांगना इम्पाना कुलकर्णी हांचो भरतनाट्यम नाच सादर जातलो. उपरांत छत्तीसगड हांगची नृत्यांगना आर्या नांदे हांच्या ओडिसी नाचान महोत्सवाची सांगता जातली.
महोत्सवांतल्यो सगळ्यो कार्यावळी रसिकां खातीर उक्त्यो आशिल्ल्यान नाचप्रेमी रसिकांनी तिनूय दीस हाजीर रावन हो महोत्सव येसस्वी करपाचो उलो आयोजकांनी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
