नीरज चोप्रान जिखलें भांगरा पदक
भांगरभूंय | प्रतिनिधी
विश्व चॅम्पियन्स सर्तींत भालो फेकींत भांगरा पदक जिखपी पयलो भारतीय
बुडापेस्ट, खबरां संस्था ः ऑलिंपिकांत 120 वर्सांनी भांगरा पदक जिखपी पयलो भारतीय खेळगडो नीरज चोप्रान आतां संवसारीक सर्तींतूय इतिहास रचलो. बुडापेस्ट – हंगेरींत सुरु आशिल्ले संवसारीक अॅथलेटिक्स चॅम्पियन्सशीप सर्तींत नीरजान भांगरा पदक जिखलें. फायनलींत ताणें 88.17 मीटर पयस भालो मारलो. संवसारीक एथलेटिक्स सर्तींत भारताचें हें तिसरें पदक. नीरजान फाटल्या हंगामांत रुप्या पदक जिखिल्लें.
ऑलिंपिक आनी संवसारीक सर्तींत एकाच वेळार भांगरा पदक जिखपी नीरज हो पयलो भारतीय. 2021 वर्साच्या टोकियो ऑलिंपिकांत ताणें भांगरा पदक जिखिल्लें. भारत 1900 सावन ऑलिंपिकांत वांटो घेता, पूण नीरजा पयलीं खंयच्याच भारतीयाक ट्रॅक आनी फिल्ड सर्तींत खंयचेच पदक मेळूंक नाशिल्लें. नीरजा पयलीं मिल्खा सिंग आनी पीटी उषा ऑलिंपिकांतले शर्यतींत चवथ्या क्रमांकाचेर पावप ही भारताची सगळ्यांत बरी कामगिरी आशिल्ली.
प्रधानमंत्री नरेंद्र मोदी हांणी व्टिट करुन नीरजाक संवसारीक एथलेटिक्स सर्तींत भांगरा पदक जिखिल्ले खातीर परबीं दिल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
